काठमाडौं । शिक्षा तथा खेलकुदमन्त्री सस्मित पोखरेलले मधेस प्रदेशको शिक्षा क्षेत्रमा रहेका समस्या पहिचान गरी समाधानका उपायसहित मन्त्रालयमा पेश गर्न राजर्षी जनक विश्वविद्यालयलाई निर्देशन दिनुभएको छ।
बुधवार धनुषामा आयोजित कार्यक्रममा बोल्दै मन्त्री पोखरेलले शिक्षा ऐन निर्माणको प्रक्रिया अघि बढिरहेको उल्लेख गर्दै मधेसको शिक्षा क्षेत्रका समस्या खोज तथा अनुसन्धानमार्फत पहिचान गर्न विश्वविद्यालयलाई आग्रह गर्नुभएको हो।
उहाँले विश्वविद्यालयहरू पढ्ने र पढाउने कार्यमा मात्र सीमित हुन नहुने बताउँदै सम्बन्धित क्षेत्रका समस्याको पहिचान तथा समाधानका लागि खोज र अनुसन्धानमा केन्द्रित हुनुपर्नेमा जोड दिनुभयो।
मन्त्री पोखरेलले मधेस प्रदेशमा शिक्षाको गुणस्तर सुधारका लागि सरकारले गम्भीरतापूर्वक काम गरिरहेको बताउनुभयो। नयाँ विश्वविद्यालय स्थापनाका लागि भवन निर्माणको प्रक्रिया समेत अघि बढिसकेको जानकारी दिँदै उहाँले उपलब्ध स्रोत र क्षमताअनुसार सबै पक्षले काममा केन्द्रित हुनुपर्ने धारणा राख्नुभयो।
मधेसका विद्यार्थी उच्च शिक्षाका लागि काठमाडौं जानुपर्ने अवस्थाको अन्त्य गर्नुपर्नेमा जोड दिँदै मन्त्री पोखरेलले मधेसमै गुणस्तरीय शिक्षा उपलब्ध गराउने वातावरण निर्माण आवश्यक रहेको बताउनुभयो।
उहाँले मधेसमा इन्जिनियरिङलगायत उच्च शिक्षाका लागि विद्यार्थी काठमाडौं जानुपर्ने अवस्थाको कारण पहिचान गर्नुपर्ने बताउनुभयो। साथै, मधेसमा शिक्षाको गुणस्तर सुधारका सम्भावनासमेत अध्ययन गरी अघि बढ्नुपर्ने उहाँको भनाइ थियो।
मन्त्री पोखरेलले राजर्षी जनक विश्वविद्यालयले अन्य विश्वविद्यालयको स्तरमा पुग्न अझै धेरै मेहनत गर्नुपर्ने आवश्यकता रहेको बताउनुभयो। विश्वविद्यालयको क्षमता अभिवृद्धि, जनशक्ति व्यवस्थापनलगायत विषयमा क्रमशः काम गर्दै शिक्षा क्षेत्र सुधारका लागि सबै पक्षले आफ्नो सामर्थ्यअनुसार योगदान दिनुपर्ने उहाँले उल्लेख गर्नुभयो।
उहाँले भन्नुभयो, “मधेस प्रदेशमा शिक्षा क्षेत्रमा रहेका समस्याहरूको खोज र अध्ययनमार्फत पहिचान गरी मन्त्रालयमा पेश गर्न राजर्षी जनक विश्वविद्यालयलाई अनुरोध गर्न चाहन्छु। हामीले शिक्षा क्षेत्रको सुधारका लागि गर्नुपर्ने कुराहरू धेरै छन्। हामी सुरुआती चरणमै छौँ। अहिले हामी सबैले आफ्नो सामर्थ्यले सक्ने सबै प्रकारका काममा फोकस हुनुपर्छ।”
राजर्षी जनक विश्वविद्यालयले अन्य विश्वविद्यालयको स्तरमा पुग्न अझै धेरै काम गर्नुपर्ने आवश्यकता रहेको पनि मन्त्री पोखरेलले बताउनुभयो।
