काठमाडौँ । नेपाली कांग्रेसको १५औँ महाधिवेशनअन्तर्गत आज चौथो दिनको बन्द सत्र सञ्चालन हुँदैछ। आजको सत्रमा महाधिवेशन प्रतिनिधिहरूले विभिन्न प्रतिवेदन तथा प्रस्तावमाथिको छलफल टुंग्याउँदै पारित गर्ने कार्यक्रम रहेको छ।
बन्द सत्रमा सभापति गगनकुमार थापाले प्रस्तुत गरेको ‘राष्ट्रिय पुनर्जागरण र समुन्नतिको राजनीतिक प्रस्ताव’, उपसभापति विश्वप्रकाश शर्माको ‘राजनीतिक संस्कृतिको क्षय र युगानुकूल रूपान्तरणको अभिभारा’ सम्बन्धी समसामयिक प्रस्ताव, महामन्त्री गुरुराज घिमिरेको संगठनसम्बन्धी प्रतिवेदन तथा कोषाध्यक्ष उमेश श्रेष्ठको आर्थिक प्रतिवेदन पारित गर्ने कार्यसूची रहेको छ।
सूचना, सञ्चार तथा प्रविधि समितिका सदस्य सुरेशराज आचार्यका अनुसार गत सोमबारदेखि जारी बन्द सत्रमा महाधिवेशन प्रतिनिधिहरूले ती प्रस्ताव तथा प्रतिवेदनमाथि धारणा राख्दै आएका छन्। छलफलमा सातै प्रदेशका प्रतिनिधिका साथै पार्टीका भ्रातृ तथा शुभेच्छुक संस्थाका प्रतिनिधिहरूको सहभागिता रहेको छ।
आज बिहान साढे १० बजेदेखि बन्द सत्र पुनः सञ्चालन गर्ने कार्यतालिका रहेको आचार्यले जानकारी दिएका छन्। प्रतिवेदन तथा प्रस्तावमाथिको छलफल सम्पन्न गरी पारित गर्ने प्रक्रिया आजै अघि बढाइने कांग्रेसले जनाएको छ।
त्यसैगरी, भोलिको सत्रको प्रारम्भमा पार्टी सभापति गगनकुमार थापाले सम्बोधन गर्ने कार्यक्रम रहेको छ। सभापतिको सम्बोधनसँगै महाधिवेशनका आगामी कार्यक्रम अघि बढाइने तयारी कांग्रेसले गरेको छ।
