काठमाडाैँ । नेपाली कांग्रेसका केन्द्रीय सदस्य नैनसिंह महरले पार्टीको १५औँ महाधिवेशनमा महामन्त्री पदमा उम्मेदवारी दर्ता गराएका छन् ।
महरले मंगलबार राष्ट्रिय सभागृह पुगेर महामन्त्री पदमा आफ्नो मनोनयन दर्ता गराएका हुन् ।
उम्मेदवारी दर्तापछि सञ्चारकर्मीसँग कुरा गर्दै महरले आफूले करिब तीन वर्षअघिदेखि नै महामन्त्रीमा उम्मेदवारी दिने तयारी गर्दै आएको बताए । उनले कुनै समूहको आग्रहमा नभई आफ्नै निर्णय र राजनीतिक योजनाअनुसार महामन्त्री पदमा उम्मेदवारी दिएको स्पष्ट पारे ।
महरले कांग्रेसभित्र विभाजित रहेका विभिन्न धारलाई एक ठाउँमा ल्याएर पार्टीलाई थप बलियो बनाउने आफ्नो मुख्य उद्देश्य रहेको बताए । पार्टीभित्र एकता कायम गर्दै संगठनलाई प्रभावकारी बनाउने योजनासहित आफू चुनावी मैदानमा आएको उनको भनाइ छ ।
