काठमाडौँ । नेपाली कांग्रेसको १५औँ महाधिवेशनअन्तर्गत बन्दसत्रमा पेस हुने एजेन्डा तथा प्रतिवेदन अनुमोदन गर्न केन्द्रीय कार्यसमितिको बैठक सुरु भएको छ।
कांग्रेस प्रवक्ता देवराज चालिसेका अनुसार चिया, नास्ता तथा खाजापछि नेताहरू खुलामञ्चमा भेला भएपछि केन्द्रीय कार्यसमितिको बैठक सुरु भएको हो।
बैठकले महाधिवेशनको बन्दसत्रमा पेस गरिने विभिन्न प्रतिवेदन तथा प्रस्ताव अनुमोदन गर्नेछ। केन्द्रीय कार्यसमितिले प्रतिवेदन पारित गरेपछि मात्रै बन्दसत्र सुरु हुने कार्यक्रम रहेको प्रवक्ता चालिसेले जानकारी दिए।
उनका अनुसार बन्दसत्रमा सभापति गगनकुमार थापाको राजनीतिक प्रतिवेदन, महामन्त्रीको विधान संशोधनसम्बन्धी प्रस्ताव तथा कोषाध्यक्षको आर्थिक प्रतिवेदन पेस गर्ने कार्यतालिका छ। बन्दसत्रमा पार्टीका राजनीतिक तथा समसामयिक विषयमा समेत छलफल हुनेछ।
बन्दसत्र सम्पन्न भएपछि कांग्रेसको नयाँ केन्द्रीय कार्यसमिति चयनका लागि निर्वाचन प्रक्रिया अघि बढ्नेछ।
यसैबीच, महाधिवेशन निर्वाचन समितिले आज साँझ ५ बजे महाधिवेशन प्रतिनिधिहरूको अन्तिम मतदाता नामावली प्रकाशन गर्ने तयारी गरेको छ। नामावली प्रकाशनपछि त्यसउपर दाबी–विरोध तथा आवश्यक छानबिनको प्रक्रिया अघि बढाइनेछ। दाबी–विरोधमाथि जाँचबुझ सम्पन्न भएपछि अन्तिम मतदाता नामावली सार्वजनिक गरिने निर्वाचन समितिले जनाएको छ।
निर्वाचन कार्यतालिकाअनुसार मंगलबार नयाँ केन्द्रीय कार्यसमितिका विभिन्न पदका लागि उम्मेदवारी मनोनयन दर्ता हुनेछ। सभापति, उपसभापति, महामन्त्री, सहमहामन्त्री तथा केन्द्रीय सदस्य पदमा उम्मेदवारी दर्ता गरिनेछ।
उम्मेदवारी मनोनयनसँगै कांग्रेसको नयाँ नेतृत्वका लागि हुने प्रतिस्पर्धाको तस्वीर थप स्पष्ट हुने अपेक्षा गरिएको छ। सभापतिसहित पदाधिकारी र केन्द्रीय सदस्यका आकांक्षी नेताहरूले यसअघि नै आन्तरिक छलफल, भेटघाट र आफ्नो पक्षमा समर्थन जुटाउने प्रयासलाई तीव्र बनाउँदै आएका छन्।
