काठमाडौं । नेपाली कांग्रेसको १५औँ महाधिवेशनमा कास्की क्षेत्र नम्बर २ बाट एकै परिवारका बाबु–छोरा महाधिवेशन प्रतिनिधिमा निर्वाचित भएका छन् ।
गण्डकी प्रदेश सभा सदस्य तथा पूर्व सामाजिक विकास, युवा तथा खेलकुदमन्त्री विन्दुकुमार थापा र उनका छोरा सौगात थापा महाधिवेशन प्रतिनिधिमा निर्वाचित भएका हुन् । सौगात ३५ वर्षमुनिको युवा समूहबाट केन्द्रीय महाधिवेशन प्रतिनिधि पदमा उम्मेदवार बनेका थिए भने विन्दुकुमारले खुलातर्फबाट उम्मेदवारी दिएका थिए ।
महाधिवेशन प्रतिनिधिमा निर्वाचित भएपछि सौगातले आफूलाई प्राप्त परिणाम व्यक्तिगत उपलब्धि मात्र नभई युवामाथि गरिएको विश्वास भएको बताएका छन् । उक्त विश्वासले कांग्रेसलाई थप गतिशील, सुदृढ र पुस्तान्तरणमुखी बनाउन जिम्मेवारी थपिएको उनको भनाइ छ ।
विन्दुकुमारले क्षेत्रीय अधिवेशनमा प्रतिनिधिहरूले दिएको माया, विश्वास र सद्भावलाई आफ्नो राजनीतिक यात्राको महत्वपूर्ण पुँजीका रूपमा लिएको बताएका छन् । उनले आगामी दिनमा पनि कांग्रेस र लोकतान्त्रिक मूल्य–मान्यताप्रति निरन्तर समर्पित रहँदै प्रतिनिधिहरूको विश्वासलाई सम्मान गर्ने प्रतिबद्धता जनाएका छन् ।
उनले अग्रजहरूको अनुभवलाई आत्मसात् गर्दै युवाको ऊर्जा, सोच र सक्रियतालाई संगठन सुदृढीकरणमा जोड्ने धारणा व्यक्त गरेका छन् ।
विन्दुकुमार गण्डकी प्रदेशका पूर्व सामाजिक विकास, युवा तथा खेलकुदमन्त्रीसमेत हुन् । प्रदेशसभा सदस्य रहँदा उनले प्रदेश सरकारबाट प्राप्त पारिश्रमिक तथा अन्य सरकारी सेवा–सुविधाबापतको रकम सामाजिक कार्यमा खर्च गर्दै आएको बताइएको छ ।
नेपाली कांग्रेसको १५औँ केन्द्रीय महाधिवेशन असोज १८ गतेदेखि सुरु हुँदैछ।
