काठमाडौँ । राष्ट्रिय स्वतन्त्र पार्टी (रास्वपा) की सांसद समीक्षा बास्कोटाले लामो समयदेखि अलपत्र रहेका संक्रमणकालीन न्यायसम्बन्धी फाइल तत्काल अघि बढाउन सरकारको ध्यानाकर्षण गराएकी छन्।
बिहीबार प्रतिनिधि सभाको बैठकमा बोल्दै बास्कोटाले करिब दुई दशकदेखि विभिन्न मन्त्रालयका दराजमा थन्किएका न्यायसम्बन्धी फाइलले अझै गति लिन नसकेको भन्दै असन्तुष्टि जनाइन्।
उनले शान्ति मन्त्रालय हुँदै गृह र कानुन मन्त्रालयसम्म पुगेका संक्रमणकालीन न्यायका मुद्दालाई सरकारले उच्च प्राथमिकतामा राख्नुपर्ने बताइन्। न्यायको पर्खाइमा रहेका पीडितले लामो समय बितिसक्दा पनि न्याय पाउन नसकेको भन्दै उनले प्रशासनिक ढिलाइ अन्त्य गर्नुपर्नेमा जोड दिइन्।
बास्कोटाले विगत एक वर्षदेखि गृह मन्त्रालयमा रोकिएको ‘जेनजी’ आन्दोलनसँग सम्बन्धित फाइललाई समेत तत्काल निर्णय प्रक्रियामा लैजान माग गरिन्।
सरकारले सात दिनभित्र फाइलहरू निर्णयार्थ अघि बढाउने प्रतिबद्धता जनाएको विषयलाई सकारात्मक रूपमा लिँदै उनले प्रतिबद्धता व्यवहारमै कार्यान्वयन हुनुपर्ने बताइन्।
‘सरकारले सात दिनभित्र फाइल अगाडि बढाउने भनेको कुरा सकारात्मक छ, तर ती फाइलहरू कहाँ र कुन अवस्थामा छन् भन्ने कुरा महत्त्वपूर्ण हुन्छ,’ उनले भनिन्।
सरकारको प्रतिबद्धता कागजमा मात्र सीमित नभई व्यवहारमा देखिनुपर्ने बताउँदै बास्कोटाले लामो समयदेखि न्यायको प्रतीक्षामा रहेका पीडितले अब न्याय पाउनेमा आफू आशावादी रहेको उल्लेख गरिन्।
