सीडीसी, एफडीए तथा एनएचएए स्थापना सम्बन्धी कार्यशाला गोष्ठीमा बोल्दै मन्त्री मेहताले तीनवटै प्रस्तावित संरचना समग्र स्वास्थ्य प्रणालीसँग जोडिएको बताउनुभयो। उहाँले औषधि तथा खाद्य नियमनमा रहेको दोहोरोपन र जिम्मेवारीको अस्पष्टता हटाउँदै औषधि, खोप, स्वास्थ्य उपकरण तथा रोग परीक्षण सामग्रीलगायतको नियमनलाई व्यवस्थित बनाउनुपर्नेमा जोड दिनुभयो।
स्वास्थ्य संस्थाको गुणस्तर सुनिश्चित गर्न सरकारी, निजी तथा गैरसरकारी सबै स्वास्थ्य संस्थाका लागि आधारभूत राष्ट्रिय मापदण्ड आवश्यक रहेको उहाँको भनाइ थियो। एनएचएएले स्वास्थ्य संस्थाको बाह्य मूल्याङ्कन तथा गुणस्तर प्रत्यायनको प्रणाली विकास गर्न सक्ने उहाँले बताउनुभयो।
त्यस्तै, सीडीसीलाई रोग निगरानी, महामारी तयारी तथा आकस्मिक प्रतिकार्यमा संघीय तहबाट प्राविधिक नेतृत्व गर्ने संरचनाका रूपमा विकास गर्न सकिने मन्त्री मेहताले बताउनुभयो। नयाँ संरचना निर्माण गर्दा हाल कार्यरत सम्बन्धित निकायका जनशक्ति र विशेषज्ञतालाई समेत उपयोग गर्नुपर्ने उहाँले स्पष्ट पार्नुभयो।
“सुधार रूपान्तरणका लागि हुनुपर्छ, विकृतिका लागि होइन। हाम्रो उद्देश्य संस्था बनाउनु मात्रै होइन, स्वास्थ्य प्रणाली बलियो बनाउनु हो,” मन्त्री मेहताले भन्नुभयो।
उहाँले प्रस्तावित तीनवटै संरचनाको अन्तिम स्वरूप तत्काल निर्धारण गर्ने चरणमा मन्त्रालय नरहेको स्पष्ट पार्नुभयो। अहिले मस्यौदा, कार्यढाँचा र मार्गचित्र तयार गर्ने चरणमा रहेको बताउँदै उहाँले संरचना निर्माणका क्रममा सम्बन्धित सरोकारवाला, प्रदेश तथा स्थानीय तह, निजी क्षेत्र, स्वास्थ्यकर्मी, विज्ञ तथा शैक्षिक क्षेत्रसँग चरणबद्ध रूपमा छलफल गरिने जानकारी दिनुभयो।
