काठमाडाैँ । नेपाली कांग्रेसको १५औँ महाधिवेशनअन्तर्गत मोरङ क्षेत्र नम्बर ६ को क्षेत्रीय अधिवेशनका क्रममा सुन्दरहरैँचामा विवाद बढेर कुटपिट तथा तोडफोड भएको छ।
सुन्दरहरैँचा नगरपालिका–४ स्थित सिक्देल बन्धु समन्वय प्रतिष्ठानमा बुधबार मनोनयन दर्ताका क्रममा विवाद उत्पन्न भएपछि अधिवेशनस्थलमा झडप भएको हो। घटनामा केही व्यक्ति घाइते भएका छन्।
प्रत्यक्षदर्शीका अनुसार उम्मेदवार चुमनारायण तवदारमाथि समेत कुटपिट भएको थियो। प्रतिनिधिको नामावलीमा एक महिलाको नाम छुटेको विषयबाट विवाद सुरु भएको बताइएको छ। माइन्युट लेख्ने क्रममा ती महिलाले आफ्नो नाम प्रतिनिधिको सूचीमा नपरेको भन्दै प्रश्न उठाएपछि विवाद बढेको थियो।
त्यसक्रममा बाहिरबाट आएका केही व्यक्तिले एक्कासि तोडफोड र आक्रमण सुरु गरेको कांग्रेस मोरङका नेताहरूले बताएका छन्। झडपपछि अधिवेशनस्थलमा भागदौड मच्चिएको थियो।
तोडफोडका क्रममा करिब ५० भन्दा बढी कुर्सीमा क्षति पुगेको बताइएको छ। घटनापछि केही समय अधिवेशनस्थलको वातावरण तनावपूर्ण बनेको थियो।
