काठमाडौं । सत्तारुढ राष्ट्रिय स्वतन्त्र पार्टी (रास्वपा) का सांसद जगदीश खरेलले पछिल्लो विपद्बाट भएको जनधनको क्षतिप्रति चिन्ता व्यक्त गर्दै विपद् व्यवस्थापनको संरचनागत सुधार गर्न सरकारसँग माग गर्नुभएको छ ।
मंगलबार प्रतिनिधि सभाको बैठकमा बोल्दै सांसद खरेलले विपद्लाई ‘दैवी प्रकोप’ भनेर पन्छिने प्रवृत्ति अन्त्य गर्नुपर्ने बताउनुभयो । उहाँले विपद् प्राकृतिक वा मानव सिर्जित कारणबाट हुने भएकाले त्यसको व्यवस्थापनका लागि राज्यका संरचना थप प्रभावकारी बनाउनुपर्नेमा जोड दिनुभयो ।
सांसद खरेलका अनुसार हालैको विपद्मा परी २७ जनाले ज्यान गुमाएका छन् भने चार जना अझै बेपत्ता छन् । विपद्का कारण अर्बौं रुपैयाँ बराबरको भौतिक क्षति भएको उल्लेख गर्दै उहाँले क्षति न्यूनीकरण र उद्धार तथा राहतका लागि दीर्घकालीन संरचनागत सुधार आवश्यक रहेको बताउनुभयो ।
‘विपद् दैवका कारण होइन, प्राकृतिक वा मानव सिर्जित हुन्छ । हामीले पटक–पटक भन्दै आएका छौं कि यसलाई दैवी प्रकोपको बिल्ला भिराएर जिम्मेवारीबाट पन्छिन मिल्दैन,’ उहाँले भन्नुभयो ।
उहाँले प्रधानमन्त्री दैवी प्रकोप उद्धार कोषको नाम परिवर्तन गरी ‘प्रधानमन्त्री विपद् राहत कोष’ बनाउन यसअघि नै सदनमार्फत माग गरिएको स्मरण गराउँदै त्यसबारे सरकारले अझै जवाफ नदिएको गुनासो गर्नुभयो ।
सांसद खरेलले विपद् व्यवस्थापन प्राधिकरणको वर्तमान संरचना र कार्यशैलीप्रति समेत प्रश्न उठाउनुभयो । सहसचिवस्तरका कर्मचारी राखेर मात्रै विपद्का जटिल समस्या समाधान गर्न नसकिने भन्दै उहाँले प्राधिकरणलाई थप अधिकारसम्पन्न र प्रभावकारी बनाउनुपर्ने बताउनुभयो ।
विपद् व्यवस्थापनसम्बन्धी विषयमा संसद्को विशेष समिति तथा सुशासन तथा राज्य व्यवस्था समितिले समेत गम्भीरतापूर्वक ध्यान दिनुपर्ने उहाँको भनाइ थियो ।
