काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले वर्षा रोकिएपछि पनि केही दिनसम्म पहिरोको जोखिम कायमै रहने जनाएको छ ।
प्राधिकरणकी प्रवक्ता शान्ति महतले लगातारको वर्षाका कारण जमिन भिजिसकेकाले वर्षा रोकिए पनि पहिरोको जोखिम तत्काल नहट्ने बताउनुभयो । उहाँका अनुसार अहिले मुख्य जोखिम नदीको बहाव बढेर हुने कटान र पहिरो रहेको छ ।
महतले नदी कटानका कारण नदी आसपासका बस्तीसमेत जोखिममा पर्न सक्ने बताउनुभयो । आइतबार रातिसम्म केही क्षेत्रमा वर्षा जारी रहन सक्ने भएकाले नदीको बहाव थप बढ्ने र बाढी तथा पहिरोको जोखिम कायमै रहने उहाँको भनाइ छ ।
उहाँले भन्नुभयो, “अहिलेको मुख्य जोखिम नदी कटान हो । कटानसँगै पहिरोको जोखिम पनि बढेको छ । अहिले नै जोखिम रोकिएको छैन । घाम लागे पनि भोलि–पर्सिसम्म पहिरो जाने सम्भावना रहन्छ, किनभने माटो धेरै भिजिसकेको छ ।”
बाढी र पहिरोका कारण विभिन्न राजमार्ग तथा ग्रामीण सडक अवरुद्ध भएका छन् । सडक सञ्चालनमा ल्याउन सडक विभागले २५० भन्दा बढी उपकरण विभिन्न स्थानमा पूर्वतयारी अवस्थामा राखेको प्राधिकरणले जनाएको छ ।
वर्षाको मात्रा कम हुँदै गएपछि सडक खुलाउने कामलाई तीव्रता दिइने महतले बताउनुभयो । उहाँका अनुसार कतिपय स्थानमा सडक सञ्चालनमा आइसकेका छन् भने अवरुद्ध सडक खुलाउन सम्बन्धित निकायसँग समन्वय भइरहेको छ ।
प्राधिकरणले नदी आसपास तथा पहिरोको जोखिम रहेका क्षेत्रमा अझै केही दिन सतर्कता अपनाउन आग्रह गरेको छ।
