विश्व पर्यटन दिवस–२०२६ को अवसरमा आइतबार काठमाडौंमा आयोजित कार्यक्रममा बोर्डका सदस्य शहदेव धमलाले बाढीबाट प्रदेशको पर्यटन क्षेत्रमा ठूलो क्षति पुगेको जानकारी दिनुभएको हो।
उहाँका अनुसार बाढीका कारण वागमती प्रदेशमा १४२ भन्दा बढी पर्यटकस्तरीय तथा साना–मझौला होटल र ६५ भन्दा बढी रेस्टुरेन्टमा क्षति पुगेको छ। बाढीबाट पर्यटन क्षेत्रमा कार्यरत जनशक्तिले समेत ठूलो मानवीय क्षति व्यहोर्नुपरेको उहाँले बताउनुभयो।
धमलाका अनुसार बाढीमा परी पथप्रदर्शक, भरिया तथा सहयोगी भूमिकामा कार्यरत १८८ जनाभन्दा बढीको मृत्यु भएको छ। यस्तै, होटलमा कार्यरत २१४ जनाको मृत्यु भएको विवरण प्राप्त भएको उहाँले जानकारी दिनुभयो।
मानवीय क्षतिको कुनै मूल्यसँग तुलना गर्न नसकिने भन्दै धमलाले पीडित परिवारको पुनःस्थापना र पर्यटन व्यवसायको पुनरुत्थानका लागि विशेष कार्ययोजना आवश्यक रहेको बताउनुभयो। विपद्पछिको पुनःस्थापना र पुनरुत्थानका लागि स्थानीय, प्रदेश र संघीय सरकारले उपलब्ध स्रोत तथा साधनको अधिकतम उपयोग गर्दै एकीकृत रूपमा काम गर्नुपर्ने उहाँको भनाइ छ।
उहाँले पर्यटन क्षेत्रको पुनरुत्थानका लागि वागमती प्रदेशले विशेष कार्यक्रम अघि बढाउनुपर्ने बताउँदै त्यसमा नेपाल पर्यटन बोर्डले आवश्यक सहकार्य गर्ने प्रतिबद्धता जनाउनुभयो।
बोर्डले विपद् जोखिम न्यूनीकरण तथा प्रतिकार्यका लागि ‘क्विक रेस्पोन्स टिम’ गठन गरी काम अघि बढाएको पनि धमलाले जानकारी दिनुभयो। उहाँका अनुसार विपद्का समयमा तत्काल प्रतिकार्य गर्न सक्ने संयन्त्र विकास गर्ने उद्देश्यले बोर्डले उक्त टोली गठन गरेको हो।
धमलाले नेपाल पर्यटन बोर्डले आफ्नो कार्यसम्पादनलाई डिजिटल प्रणालीमा रूपान्तरण गर्ने तथा ग्रामीण पर्यटन प्रवद्र्धनका कार्यक्रमलाई समेत अघि बढाइरहेको जानकारी दिनुभयो।
