काठमाडाैँ । लगातार वर्षापछि पृथ्वी राजमार्ग, कान्ति राजमार्ग र बीपी राजमार्गमा यातायात प्रभावित भएको छ ।
पृथ्वी राजमार्गअन्तर्गत कृष्णभीरमा सडकको नदीतर्फको ग्याबियन केही तल झरेको छ । हाल सञ्चालनमा रहेको सडकको माथिल्लो भागको स्लोपमा भने कुनै समस्या नदेखिएको सडक आयोजनाले जनाएको छ । लगातार वर्षा भइरहेकाले स्थानीय प्रशासनले अर्को सूचना जारी नभएसम्म यातायात सञ्चालनमा रोक लगाएको छ । परियोजना टोलीले सडकको अवस्था निरन्तर निगरानी गरिरहेको छ ।
कान्ति राजमार्गमा हालसम्म मुख्य समस्या नदेखिए पनि स्थानीय प्रशासनले अर्को सूचना जारी नभएसम्म यातायात सञ्चालनमा रोक लगाएको छ । त्रिभुवन राजपथमा भने कुनै समस्या नदेखिएकाले यातायात सुचारु रहेको छ ।
यस्तै, बीपी राजमार्गमा भर्खरै काम सुरु गरिएको खण्डको डाइभर्सनमा केही समस्या देखिएको छ । अन्य स्थानमा हालसम्म कुनै समस्या नदेखिएको जनाइएको छ । उक्त राजमार्गमा पनि स्थानीय प्रशासनले अर्को सूचना जारी नभएसम्म यातायात सञ्चालनमा रोक लगाएको छ ।
सडकको अवस्थाबारे निरन्तर निगरानी तथा अनुगमन भइरहेको सम्बन्धित निकायले जनाएको छ । पछिल्लो अवस्था असोज ९ गते बिहान ९ः३० बजेसम्मको हो ।
