चितवन । लगातार भइरहेको वर्षा र आगामी केही दिन अति भारी वर्षा हुनसक्ने मौसम पूर्वानुमानपछि नारायणगढ–मुग्लिन सडकखण्डमा रातिको समयमा सवारी आवागमन पूर्ण रूपमा बन्द गरिएको छ ।
जिल्ला प्रशासन कार्यालय चितवनले बिहीबार सूचना जारी गर्दै यात्रु तथा सवारी साधनको सुरक्षालाई मध्यनजर गरी असोज ८ गते राति ८ बजेदेखि असोज ९ गते बिहान ५ बजेसम्म नारायणगढ–मुग्लिन सडकखण्डमा सबै प्रकारका सवारी साधनको आवागमनमा रोक लगाइएको जनाएको हो ।
मौसममा आएको परिवर्तनका कारण चितवन र आसपासका क्षेत्रमा निरन्तर वर्षा भइरहेको तथा आगामी दिनमा अति भारी वर्षा हुनसक्ने सूचना मौसम पूर्वानुमान महाशाखाबाट प्राप्त भएको प्रशासनले जनाएको छ । भारी वर्षाका कारण बाढी, पहिरो तथा डुबानलगायत विपद्को जोखिम बढ्न सक्ने भएकाले सडकमा सवारी सञ्चालन रोक्ने निर्णय गरिएको हो ।
प्रशासनले यात्रु तथा सवारी चालकलाई मौसम र सडकको अवस्था बुझेर मात्र यात्रा गर्न, जोखिमयुक्त क्षेत्रमा नजान तथा सम्बन्धित निकायबाट जारी हुने सुरक्षा निर्देशनको पूर्ण पालना गर्न आग्रह गरेको छ ।
सडकको अवस्था तथा सुरक्षा व्यवस्थाबारे जानकारीका लागि नेपाल प्रहरीको १००, ट्राफिक प्रहरीको १०३ र सशस्त्र प्रहरी बलको १११४ मा सम्पर्क गर्न सकिने जिल्ला प्रशासन कार्यालयले जनाएको छ।
