बिहीवार बसेको प्रतिनिधि सभा बैठकमा बोल्दै सांसद पोखरेलले पहाडी क्षेत्रमा बढ्दै गएको बँदेल आतङ्क नियन्त्रणका लागि आवश्यक कानुनी व्यवस्था गरी सुरक्षाकर्मी परिचालन गर्न पनि सरकारको ध्यानाकर्षण गराउनुभयो।
उहाँले देशमा पटक–पटक देखिने एलपीजी ग्यासको अभाव अन्त्य गर्न स्वदेशमै रहेको ग्यास भण्डारको उपयोग गर्नुपर्नेमा जोड दिनुभयो। दैलेखका भैरवी गाउँपालिका, दुल्लु नगरपालिका, नारायण नगरपालिका र चामुण्डा बिन्द्रासैनी नगरपालिकाका ४० वडाभित्र चारवटा ठूला ग्यास भण्डार रहेको तथ्य प्रस्तुत गर्दै उहाँले जलजले क्षेत्रको मिथेन ग्यास उत्खनन गर्न सके नेपाललाई करिब ५० वर्षसम्म पुग्ने ग्यास उत्पादन गर्न सकिने दाबी गर्नुभयो।
सरकारले ग्यासको सम्भाव्यता उपयोग गर्नुको सट्टा भण्डारणस्थलमा ‘भोटे ताल्चा’ लगाएर राखेको आरोप लगाउँदै उहाँले अन्य सम्भावित स्थानबाट समेत व्यावसायिक उत्पादन गरी निर्यात गर्न सकिने बताउनुभयो।
सांसद पोखरेलले गुठी प्रथाका कारण देशभरका लाखौँ किसान समस्यामा परेको उल्लेख गर्दै तत्काल समस्या समाधान गर्न माग गर्नुभयो। उहाँका अनुसार दैलेखमा मात्रै ९३ हजार रोपनी, पहाडी जिल्लामा करिब साढे सात लाख रोपनी र तराईमा ६७ हजार बिघा जग्गा गुठीअन्तर्गत रहेको छ।
लालपुर्जा भए पनि गुठी जग्गा बिक्री गर्न, धितो राख्न तथा घरमा विद्युत् मिटरसमेत जडान गर्न नपाउने अवस्था रहेको उल्लेख गर्दै उहाँले संविधानको धारा २९० बमोजिम अविलम्ब गुठी विधेयक ल्याउन सरकारसँग माग गर्नुभयो।
९०० मेगावाट क्षमताको माथिल्लो कर्णाली जलविद्युत आयोजना १८ वर्षदेखि निजी कम्पनीको कब्जामा परेर बन्धक बनेको उहाँले आरोप लगाउनुभयो। तुलनात्मक रूपमा कम लागतमा निर्माण गर्न सकिने राष्ट्रिय गौरवको आयोजना प्रवद्र्धक कम्पनीले अघि बढाउन नसकेको भन्दै उहाँले अब सरकारले नै आयोजना जिम्मा लिएर निर्माण कार्य अघि बढाउनुपर्ने बताउनुभयो।
