बिहीवार बसेको प्रतिनिधि सभा बैठकमा नेकपा (एमाले) की सांसद साजिदा खातुन सिद्दिकीले दाङको घोराहीकी १२ वर्षीया आयशा परबिनको स्वास्थ्य अवस्थाप्रति सरकारको ध्यानाकर्षण गराउँदै घटनाको छानबिन, उपचार र पीडित परिवारलाई क्षतिपूर्तिको व्यवस्था गर्न माग गर्नुभएको हो ।
सांसद सिद्दिकीका अनुसार कक्षा ६ मा अध्ययनरत बालिकालाई एचपीभी खोप लगाएपछि स्वास्थ्यमा जटिलता देखिएको थियो । गम्भीर बिरामी भएपछि उनलाई राप्ती स्वास्थ्य विज्ञान प्रतिष्ठानमा नौ दिनसम्म भेन्टिलेटरसहितको सघन उपचार कक्षमा राखेर उपचार गरिएको थियो ।
हाल बालिका घर फर्किए पनि उनका हातखुट्टा चल्न नसक्ने अवस्था रहेको सांसद सिद्दिकीले सदनलाई जानकारी गराउनुभयो । उहाँले घटनाबारे स्वास्थ्य मन्त्रालयले गम्भीरतापूर्वक छानबिन गरी सत्यतथ्य सार्वजनिक गर्नुपर्ने र पीडित परिवारलाई आवश्यक उपचार तथा उचित क्षतिपूर्तिको व्यवस्था गर्नुपर्ने बताउनुभयो ।
यसैगरी, सांसद सिद्दिकीले रसुवामा आएको बाढीका क्रममा बेपत्ता भएका नागरिकको खोजी कार्य र उनीहरूको अवस्थाबारे पनि सरकारसँग जवाफ माग गर्नुभयो । बेपत्ता नागरिकको अवस्था अझै स्पष्ट हुन नसक्नु दुःखद् रहेको भन्दै उहाँले खोज तथा उद्धारलाई प्रभावकारी बनाउन सरकारको ध्यानाकर्षण गराउनुभयो ।
उहाँले देशमा बढिरहेको महँगी, नागरिकले भोगिरहेको आर्थिक संकट तथा आत्महत्याका घटनाप्रति समेत सरकारको ध्यानाकर्षण गराउनुभयो । महँगीका कारण नागरिकको दैनिकी कठिन बन्दै गएको भन्दै उहाँले आत्महत्याका घटना बढ्नुका कारण पहिचान गरी नागरिकको जीवनरक्षाका लागि सरकारले ठोस योजना ल्याउनुपर्ने माग गर्नुभयो ।
सांसद सिद्दिकीले सरकार देशको जिम्मेवार अभिभावक भएकाले नागरिकका समस्याबारे ठोस योजनासहित सदन र जनतालाई जवाफ दिनुपर्ने बताउनुभयो।
