काठमाडौं । राष्ट्रिय स्वतन्त्र पार्टीका सांसद डा. लेखजंग थापाले राष्ट्रिय विधि विज्ञान प्रयोगशालालाई शैक्षिक ‘लर्निङ प्लेटफर्म’ का रूपमा विकास गर्नुपर्ने बताउनुभएको छ ।
बिहीवार बसेको शिक्षा, स्वास्थ्य तथा सूचना प्रविधि समितिको बैठकमा विधेयकको मस्यौदा प्रतिवेदनमाथिको छलफलमा सहभागी हुँदै सांसद थापाले प्रयोगशालामा विज्ञ तथा विद्यार्थीलाई ‘अवलोकनकर्ता’ का रूपमा सहज पहुँच दिने व्यवस्था गर्नुपर्ने प्रस्ताव गर्नुभएको हो ।
उहाँले राष्ट्रिय विधि विज्ञान प्रयोगशाला प्राज्ञिक संस्था नभए पनि त्यहाँ हुने उच्चस्तरीय कार्यसम्पादन प्राज्ञिक व्यक्ति तथा विद्यार्थीका लागि अध्ययन र अनुभव हासिल गर्ने महत्वपूर्ण अवसर बन्न सक्ने बताउनुभयो ।
प्रयोगशालामा प्रशिक्षण तथा सिकाइका लागि आउने व्यक्तिलाई अवलोकनकर्ताका रूपमा लिने वा नलिने विषयमा विधेयकमै स्पष्ट व्यवस्था गर्नुपर्ने उहाँको भनाइ थियो । अवलोकनकर्ताका रूपमा आउने व्यक्तिबाट शुल्क लिने वा नलिने विषयसमेत स्पष्ट गर्नुपर्ने सांसद थापाले बताउनुभयो ।
उहाँले विदेशमा अध्ययन वा अवलोकनका लागि जाँदा निश्चित शुल्क तिर्नुपर्ने व्यवस्था हुने गरेको उल्लेख गर्दै राष्ट्रिय विधि विज्ञान प्रयोगशालामा पनि यस्तै प्रावधान राख्न सकिने धारणा राख्नुभयो ।
यस्तो व्यवस्था अहिले नै स्पष्ट गर्न सके भविष्यमा अवलोकन, प्रशिक्षण तथा अध्ययनसम्बन्धी गतिविधिलाई व्यवस्थित र नियमन गर्न सहज हुने उहाँले बताउनुभयो । साथै, यसले प्रयोगशालाको सञ्चालन प्रक्रियालाई दीर्घकालीन रूपमा थप व्यवस्थित बनाउन सहयोग पुग्ने विश्वास व्यक्त गर्नुभयो।
