काठमाडौं । चालु आर्थिक वर्ष २०८३/८४ को भाद्र ६ गतेसम्म भन्सार विभागले एक खर्ब रुपैयाँभन्दा बढी राजस्व संकलन गरेको छ।
चालु आर्थिक वर्षका लागि विभागले ६ खर्ब २८ अर्ब रुपैयाँ राजस्व संकलन गर्ने वार्षिक लक्ष्य निर्धारण गरेकोमा भाद्र ६ गतेसम्म १ खर्ब २ अर्ब रुपैयाँ राजस्व असुली भएको अर्थ मन्त्रालय, अर्थमन्त्रीको सचिवालयले जनाएको छ। योसँगै चालु आर्थिक वर्षमा अब ५ खर्ब २७ अर्ब रुपैयाँ राजस्व संकलन गर्न बाँकी रहेको छ।
तातोपानी भन्सार कार्यालय केही समयदेखि सञ्चालनमा नरहेको तथा भोटेकोशीमा आएको बाढीका कारण रसुवा भन्सार कार्यालय पूर्ण रूपमा क्षतिग्रस्त भई सञ्चालनमा आउन नसकेको अवस्थामा पनि भन्सार प्रशासनले एक खर्ब रुपैयाँभन्दा बढी राजस्व संकलन गरेको हो।
विषम परिस्थितिका बीच पनि भन्सार प्रशासनको निरन्तर प्रयासबाट उक्त राजस्व संकलन गर्न सफल भएको अर्थ मन्त्रालयले जनाएको छ। आगामी दिनमा बाँकी ५ खर्ब २७ अर्ब रुपैयाँ राजस्व असुलीमा विभागले विशेष ध्यान केन्द्रित गर्ने जनाएको छ।
अर्थ मन्त्रालयका अनुसार चालु आर्थिक वर्षको राजस्व लक्ष्य पूरा गर्न भन्सार प्रशासनले उपलब्ध स्रोत, साधन र संरचनाको प्रभावकारी परिचालनलाई प्राथमिकतामा राख्नेछ।
