काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद मनिष झाले जानकी मन्दिर क्षेत्रलाई संरक्षित स्मारक क्षेत्र घोषणा गर्ने मन्त्रिपरिषद्को निर्णयको स्वागत गर्नुभएको छ ।
बुधबार बसेको प्रतिनिधि सभा बैठकमा बोल्दै सांसद झाले गत वर्षको चुनावी अभियानका क्रममा जनकपुरमा व्यक्त गरिएको प्रतिबद्धताअनुसार जानकी मन्दिरलाई विश्व सम्पदा सूचीमा सूचीकृत गराउने प्रक्रिया अघि बढेको भन्दै सरकारप्रति आभार व्यक्त गर्नुभयो ।
उहाँले माघ ५ गते जनकपुरबाट चुनावी अभियान सुरु गर्दा जानकी मन्दिरलाई विश्व सम्पदा सूचीमा सूचीकृत गराउने प्रतिबद्धता व्यक्त गरिएको स्मरण गर्दै मन्त्रिपरिषद्ले मन्दिर क्षेत्रलाई संरक्षित स्मारक क्षेत्र घोषणा गरेसँगै उक्त प्रतिबद्धता कार्यान्वयनको दिशामा अघि बढेको बताउनुभयो ।
सांसद झाले पछिल्लो समय सरकारी कामकारबाहीमा देखिएको तदारुकताको पनि प्रशंसा गर्नुभयो । विशेषगरी बाढीका कारण क्षतिग्रस्त कृष्णभीरको सडक १२ दिनमै सञ्चालनमा ल्याउन भौतिक पूर्वाधार तथा यातायात मन्त्रालयले गरेको पहलको उहाँले प्रशंसा गर्नुभयो । उहाँले सरकारले देखाएको कार्यसम्पादनको गति अन्य आयोजनामा पनि आवश्यक रहेको बताउनुभयो ।
सांसद झाले विभिन्न स्थानमा रहेका बाढीपीडितका अस्थायी शिविरमा महिला तथा बालबालिकाको सुरक्षा चुनौतीपूर्ण बन्दै गएकोप्रति सरकारको ध्यानाकर्षणसमेत गराउनुभयो । असुरक्षित वातावरणका कारण बाढीपीडित थप समस्यामा पर्न सक्ने भन्दै उहाँले शिविरमा सुरक्षा र व्यवस्थापन प्रभावकारी बनाउन तत्काल कदम चाल्न सरकारसँग माग गर्नुभयो । तस्बिरः रत्न श्रेष्ठ/रासस
