काठमाडौं । प्रधानमन्त्री वालेन्द्र शाहले मलेसियाका प्रधानमन्त्री अनवर इब्राहिमसँग टेलिफोनमार्फत छलफल गर्दै नेपाली श्रमिकले भोग्दै आएका सिन्डिकेट र बिचौलियातन्त्र अन्त्य गर्न आग्रह गरेका छन् ।
मंगलबार बिहान भएको टेलिफोन वार्तामा प्रधानमन्त्री शाहले नेपाल र मलेसियाबीचको वैदेशिक रोजगारीलाई मर्यादित, पारदर्शी र शोषणमुक्त बनाउनुपर्नेमा जोड दिएका हुन् ।
प्रधानमन्त्री शाहले मलेसियाको रोजगारी क्षेत्रमा रहेको सिन्डिकेट तथा बिचौलिया प्रथा नेपाल सरकारलाई स्वीकार्य नरहेको स्पष्ट पारे । यस्ता प्रवृत्तिका कारण नेपाली श्रमिक मारमा परेको भन्दै उनले समस्याको स्थायी समाधानका लागि दुवै देशले संयुक्त रूपमा पहल गर्नुपर्ने बताए ।
शाहले मलेसियाका श्रममन्त्रीलाई नेपालका श्रममन्त्रीसँग प्रत्यक्ष वार्तामा बसाएर समस्या समाधानका लागि आवश्यक कदम चाल्न प्रधानमन्त्री इब्राहिमसँग आग्रह गरे ।
प्रधानमन्त्री शाहको आग्रहलाई सकारात्मक रूपमा लिँदै मलेसियाली प्रधानमन्त्री इब्राहिमले आफू पनि सिन्डिकेट र बिचौलिया प्रथाको विपक्षमा रहेको बताए । उनले यस विषयमा आफ्ना श्रममन्त्रीलाई तत्काल नेपाली समकक्षीसँग समन्वय गरी ठोस निकास निकाल्न निर्देशन दिने प्रतिबद्धता जनाए ।
दुवै प्रधानमन्त्रीबीचको छलफलमा नेपाली श्रमिकको हित संरक्षण गर्दै वैदेशिक रोजगारीलाई थप व्यवस्थित र पारदर्शी बनाउने विषयमा सहकार्य अघि बढाउने समझदारी बनेको छ ।
