काठमाडौं । निर्वाचन आयोगले आगामी निर्वाचनका लागि प्रारम्भिक मतदाता नामावली सार्वजनिक गर्दै नामावली सच्याउने तथा दाबी–विरोधका लागि असोज १२ गतेसम्मको समयसीमा तोकेको छ।
आयोगले आफ्नो आधिकारिक वेबसाइटमार्फत प्रारम्भिक मतदाता नामावली सार्वजनिक गरेको हो। सार्वजनिक सूचीमा गत भदौ १५ गतेसम्म मतदाता नामावलीमा नाम दर्ता गराएका नागरिकको विवरण समावेश गरिएको आयोगले जनाएको छ।
नाम, थर, जन्ममितिलगायत विवरणमा त्रुटि भए मतदाताले आयोगको वेबसाइटमार्फत अनलाइन आवेदन दिएर सच्याउन सक्ने आयोगका सूचना अधिकारी सुमन घिमिरेले जानकारी दिनुभयो।
उहाँका अनुसार असोज १ गतेदेखि १२ गतेसम्म मतदाताले आफ्नो विवरण जाँच गरी त्रुटि भए समयमै सच्याउन निवेदन दिन सक्नेछन्। अन्तिम मतदाता नामावलीमा नाम समावेश भएका नागरिकले मात्र निर्वाचनमा मतदान गर्न पाउने कानुनी व्यवस्था रहेकाले विवरण यकिन गर्न आयोगले आग्रह गरेको छ।
आयोगले मतदाता नामावली संकलन तथा अद्यावधिकका लागि दुईवटा विधि अपनाएको छ। राष्ट्रिय परिचयपत्रमा आबद्ध भइसकेका मतदाताले अनलाइन प्रणालीमार्फत तस्बिर तथा जैविक विवरण उपलब्ध गराउन सक्नेछन् भने राष्ट्रिय परिचयपत्रमा आबद्ध नभएका नागरिकले सम्बन्धित जिल्ला वा प्रदेश निर्वाचन कार्यालयमा उपस्थित भएर विवरण उपलब्ध गराउनुपर्नेछ।
यस अवधिमा नामावलीमा अयोग्य व्यक्तिको नाम समावेश भएको भए हटाउन तथा नागरिकता त्याग गरिसकेका व्यक्तिको नाम हटाउनसमेत उजुरी वा निवेदन दिन सकिने आयोगले जनाएको छ।
तोकिएको समयभित्र प्राप्त हुने निवेदन तथा दाबी–विरोधमाथि आवश्यक छानबिन गरी आयोगले मतदाता नामावलीलाई अन्तिम रूप दिने जनाएको छ।
