काठमाडौं । प्रभु बैंक लिमिटेडले विदेशमा कार्यरत तथा विदेशमा बसोबास गर्ने नेपाली नागरिकलाई लक्षित गर्दै ‘प्रभु प्रवासी समृद्धि योजना २०८३/८४’ सार्वजनिक गरेको छ।
बैंकका अनुसार प्रवासी नेपालीलाई घर तथा जग्गा खरिदलगायत आवासीय आवश्यकताका लागि सहज, प्रतिस्पर्धी र सुविधाजनक कर्जा सुविधा उपलब्ध गराउने उद्देश्यले योजना ल्याइएको हो। योजनामार्फत विप्रेषणबाट प्राप्त रकमलाई बैंकिङ प्रणालीमा परिचालन गर्दै प्रवासी नेपालीको दीर्घकालीन वित्तीय आवश्यकता पूरा गर्ने लक्ष्य बैंकले लिएको छ।
योजनाअन्तर्गत घर कर्जामा अधिकतम ३ करोड रुपैयाँसम्म कर्जा उपलब्ध गराइनेछ। कर्जाको अवधि अधिकतम २५ वर्षसम्म रहनेछ भने सेवा शुल्क ०.५० प्रतिशत र ब्याजदर औसत आधार दरमा थप ०.५० प्रतिशत प्रतिवर्ष कायम गरिएको बैंकले जनाएको छ। यो सुविधा देशभरका ३०० शाखाबाट उपलब्ध हुने बताइएको छ।
घर तथा अपार्टमेन्ट खरिद, घर निर्माण तथा मर्मत र जग्गा खरिदका लागि ग्राहकले यस योजनाअन्तर्गत कर्जा सुविधा लिन सक्नेछन्।
त्यस्तै, बढीमा दुई जना सन्तानको नेपाल वा विदेशमा अध्ययनका लागि औसत आधार दरमा थप १ प्रतिशत प्रतिवर्ष ब्याजदरमा शैक्षिक कर्जा उपलब्ध गराइने बैंकले जनाएको छ। शैक्षिक कर्जाको प्रशासनिक शुल्कमा ५० प्रतिशत छुट तथा पहिलो वर्ष डेबिट कार्ड र मोबाइल बैंकिङ सेवा निःशुल्क उपलब्ध गराइनेछ।
प्रभु बैंकले प्रवासी नेपालीबाट प्राप्त विप्रेषणलाई औपचारिक बैंकिङ माध्यमबाट परिचालन गर्दै निक्षेप विस्तार, उत्पादनशील क्षेत्रमा कर्जा प्रवाह र दीर्घकालीन बैंकिङ सम्बन्ध विस्तारमा योजना सहयोगी हुने विश्वास व्यक्त गरेको छ। साथै, विदेशमा कार्यरत तथा बसोबास गर्ने नेपालीलाई आफ्नो र परिवारको भविष्यका लागि आवासीय सम्पत्ति निर्माण तथा खरिदमा वित्तीय सहयोग पुग्ने बैंकको अपेक्षा छ।
