काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले असोज ९ गतेदेखि देशका विभिन्न स्थानमा भारी वर्षाको सम्भावना रहेको भन्दै सतर्कता अपनाउन आग्रह गरेको छ ।
प्राधिकरणले भारी वर्षाका कारण बाढी, पहिरो तथा डुबानको जोखिम बढ्न सक्ने भएकाले अनावश्यक रूपमा रातिको समयमा यात्रा नगर्न सर्वसाधारणलाई अनुरोध गरेको हो ।
त्यस्तै, नदी तथा खोलानालाको आसपास बसोबास गर्ने नागरिकलाई विशेष सतर्कता अपनाउन र जोखिमको अवस्था देखिए सुरक्षित स्थानतर्फ जान प्राधिकरणले आग्रह गरेको छ ।
प्राधिकरणले विपद्को समयमा आवश्यक सहयोग परेमा राष्ट्रिय विपद् सहायता नम्बर १२३४, नेपाल प्रहरीको १०० तथा सशस्त्र प्रहरी बल नेपालको १११४ मा सम्पर्क गर्न आग्रह गरेको छ ।
