काठमाडौं । बागमती प्रदेशको मुख्यमन्त्रीमा नेकपा एमालेका सांसद किरण थापा मगर नियुक्त भएका छन्।
एमाले, नेकपा र राप्रपाको समर्थनमा बुधबार मुख्यमन्त्रीका लागि दाबी पेस गरेका थापा मगरलाई प्रदेश प्रमुख दीपक देवकोटाले बिहीबार मुख्यमन्त्रीमा नियुक्त गरेका हुन्।
नयाँ सरकार गठनका लागि सत्ता साझेदार दलहरूबीच मन्त्रालय बाँडफाँटमा समेत सहमति जुटिसकेको छ। सहमतिअनुसार एमालेले मुख्यमन्त्रीसहित तीन मन्त्रालय, राप्रपाले तीन तथा नेकपाले दुई मन्त्रालय पाउनेछन्।
तर, सरकार गठनमा राप्रपाको समर्थनलाई लिएर पार्टीभित्रै विवाद उत्पन्न भएको छ। राप्रपाका संसदीय दलका नेता उद्धव थापाले मुख्यमन्त्री थापा मगरलाई समर्थन गरेपछि पार्टीमा विवाद चुलिएको हो।
उद्धव थापालाई संसदीय दलको नेता तथा पार्टीको साधारण सदस्यबाट समेत हटाउन सिफारिस गर्ने निर्णय राप्रपाको केन्द्रीय कार्यसम्पादन समितिले बिहीबार गरेको छ।
यससँगै नयाँ सरकार गठनसँगै बागमती प्रदेशमा सत्ता समीकरणसँगै राप्रपाभित्रको आन्तरिक विवाद पनि थप सतहमा आएको छ।
