काठमाडाैँ । वाणिज्य, आपूर्ति तथा उपभोक्ता संरक्षण विभागले खाना पकाउने एलपीजी ग्यासको कृत्रिम अभाव सिर्जना गर्ने, लुकाइछिपाइ बिक्री गर्ने तथा तोकिएको मूल्यभन्दा बढीमा बिक्री गर्ने ग्यास विक्रेता र डिपोमाथि प्रचलित कानूनअनुसार हदैसम्मको कारबाही गरिने चेतावनी दिएको छ।
विभागले शुक्रबार सूचना जारी गर्दै आम उपभोक्ताले खाना पकाउने एलपीजी ग्यास सहज रूपमा नपाएको, केही ग्यास विक्रेता तथा डिपोले आफ्ना निकट व्यक्ति, होटल तथा व्यवसायीलाई मात्रै प्राथमिकताका साथ ग्यास उपलब्ध गराएको तथा तोकिएको मूल्यभन्दा बढीमा बिक्री गरेको भन्ने गुनासो र उजुरी प्राप्त भएको जनाएको छ। यस्ता गतिविधिप्रति विभागको गम्भीर ध्यानाकर्षण भएको उल्लेख गर्दै सम्बन्धित निकायसँग समन्वय गरी निरन्तर अनुगमन भइरहेको पनि विभागले जनाएको छ।
विभागका अनुसार खाना पकाउने एलपीजी ग्यास अत्यावश्यक उपभोग्य वस्तु भएकाले उपभोक्ताले तोकिएको मूल्यमा सहज रूपमा प्राप्त गर्नु उपभोक्ताको अधिकार हो। ग्यास सिलिन्डर लुकाइछिपाइ बिक्री–वितरण गर्ने, कृत्रिम अभाव सिर्जना गर्ने, कालोबजारी गर्ने वा तोकिएको मूल्यभन्दा बढीमा बिक्री गर्ने कार्य कानूनविपरीत भएकाले त्यस्तो कार्यमा संलग्न पाइए कडा कानुनी कारबाही गरिने चेतावनी दिइएको छ।
यस्ता गैरकानुनी गतिविधि देखिएमा वा उपभोक्ता स्वयं ठगिएको अनुभूति भएमा नजिकको प्रहरी कार्यालय, जिल्ला प्रशासन कार्यालय वा विभागको टोल–फ्री नम्बर ११३७ मा जानकारी गराउन विभागले सबै उपभोक्तासँग अनुरोध गरेको छ।
विभागले हाल ७.१ केजीको सट्टा १४.२ केजी क्षमताको एलपीजी ग्यास सिलिन्डर वितरण गर्ने प्रक्रियाका कारण केही समय वितरणमा असहजता देखिएको स्वीकार गर्दै उक्त समस्या छिट्टै समाधान हुने जनाएको छ। विभागले आम उपभोक्तालाई अनावश्यक रूपमा नआत्तिन र संयमित रहन पनि आग्रह गरेको छ।
