काठमाडौँ । पाकिस्तानको कराकोरम हिमशृङ्खलामा अवस्थित ब्रोड पिक हिमालमा हिमपहिरोमा परी ज्यान गुमाएका नेपाली पर्वतारोही निर्मल पुर्जासहित आरोहीहरूको शव उद्धारका लागि टोली क्याम्प–१ तर्फ झर्ने तयारीमा जुटेको छ।
उद्धार अभियानमा खटिएको स्थल टोलीका अनुसार पहिलो चरणमा हिमपहिरोमा परी निधन भएका आरोहीहरूको शव क्याम्प–१ सम्म ल्याइनेछ। त्यसपछि सोमबार शवहरूलाई जापानी क्याम्पसम्म ल्याउने तयारी गरिएको छ।
मौसम तथा हिमालको अवस्था अनुकूल भए जापानी क्याम्पबाट हेलिकप्टरमार्फत उद्धार टोली र शवहरूलाई थप सुरक्षित स्थानमा सारिने जनाइएको छ। दिवंगत आरोहीहरूको शव सुरक्षित रूपमा उद्धार गरी सम्मानपूर्वक स्वदेश फर्काउने तयारी भइरहेको टोलीले जनाएको छ।
गत बिहीबार (१४ साउन) पाकिस्तानको कराकोरम हिमशृङ्खलामा पर्ने ८ हजार ४७ मिटर अग्लो ब्रोड पिकमा हिमपहिरो गएको थियो। हिमपहिरोमा परी निर्मल पुर्जासहित १० जना आरोही बेपत्ता भएका थिए। बेपत्तामध्ये ६ जना नेपाली पर्वतारोही थिए। पुर्जा सो आरोहण टोलीका नेता थिए।
पुर्जाको निधन भएको पुष्टि शनिबार मात्रै भएको थियो। हिमपहिरोमा परी ज्यान गुमाएका पुर्जासहित अन्य आरोहीहरूको शव उद्धार गरी स्वदेश ल्याउने प्रक्रिया अघि बढाइएको हो।
