काठमाडाैँ । काठमाडौं महानगरपालिकाले माइतीघरको डुबान अन्त्य गर्न ढल निकास फराकिलो बनाउने कार्य शुरु गरेको छ ।
माईतीघर लगायतका क्षेत्रमा वर्षेनी दोहोरिने डुबान र ढल निकासको समस्याको दीर्घकालिन समाधानका लागि महानगरपालिकाले ढल निकासलाई फराकिलो बनाउन लागेको हो । महानगरले बुधवार माईतीघरबाट आर्मी मुख्यालय छिर्ने बाटोतर्फबाट निकास सफा गर्ने तथा खुलाउने काम गरिरहेको छ । यसअघि राष्ट्रिय विपद् जोखिम न्युनिकरण तथा व्यवस्थापन प्राधिकरणको संयोजकत्वमा गठित चार सदस्यीय संयुक्त प्राविधिक टोलीले प्राविधिक त्रुटी, अव्यवस्थित शहरीकरण र संरचनागत अतिक्रमणको कारण डुबान तथा ढल निकासको समस्या उत्पन्न भएको निष्कर्षसहित प्रतिवेदन बुझाएको थियो ।
साउन ६ गते बुझाइएको उक्त प्रतिवेदनले शहरीकरण विस्तारको क्रममा अव्यवस्थित शहरीकरणका कारण ढल निकासमा अवरोध सिर्जना हुँदा वर्षेनी डुबान हुने गरेको देखाएको छ । उक्त प्रतिवेदनको कार्यान्वयन गर्दै महनगरपालिकाले थापाथली कलेज, तथ्यांक विभागलगायत कार्यालय नजिकको ढल निकास खुलाउने कार्य शुरु गरेको हो । सडक डिभिजन काठमाडौंका डिभिजन प्रमुख सुवोधकुमार देवकोटाले माईतीघर डुबानमा पार्नुको कारण ढल निकास साँघुरो रहेको र कतिपय स्थानमा पुरिएको भेटिएको बताउनु भयो ।
उहाँले अगामी दिनहरुमा वर्षा हुँदा डुबान तथा बाढीको समस्या नआओस् भनेर पुरिएको निकास हटाएर थप फराकिलो बनाउने कबबार्य भइरहेको बताउनु भयो । उहाँले सैनिक मुख्यालय परिसरमा रहेको ब्यारेक आसपासका विभिन्न स्थानमा गरिएको उत्खननका क्रममा ढल निकासमा अवरोध (ब्लकेज) भेटिएकाले बताउनु भयो । उहाँले सम्बन्धित निकायहरुसँग समन्वय गरी ढल निकासलाई फराकिलो बनाउने कार्य भइरहेको बताउनु भयो ।
काठमाडौं महानगरपालिकाका महानगर प्रहरी प्रमुख विष्णुप्रसाद जोशीले माईतीघरको डुबान समस्या समाधानका लागि महानगर प्रहरीले अहोरात्र खटिएर काम गरिरहेको बताउनु भयो । उहाँकाअनुसार सैनिक मुख्यालयको उत्तर कुनादेखि थापाथली क्याम्पस हुँदै राष्ट्रिय वाणिज्य बैंकसम्म खोलाको सतह सुधार तथा ढल निकास विस्तार कार्य भइरहेको बताउनु भयो । उहाँले ढल निकासको बहाव क्षमता वृद्धि गरी वर्षायाममा हुने डुबान न्यूनीकरण गर्न सबे क्षेत्रको ढल निकासलाई फराकिलो बनाइने बताउनु भयो ।
काठमाडौं महानगरपालिकाको विपद् व्यवस्थापन विभागका प्रमुख अनिरुद्र नेपालले माईतीघरमा हुने बाढी र डुबानको विषयमा धेरै चरणमा छलफल भइसकेपछि ढल खुलाउने कार्य भइरहेको बताउनु भयो । उहाँले थापाथली क्याम्पस, राष्ट्रिय वाणिज्य बैंक र राष्ट्रिय तथ्याङ्क कार्यालय (तथ्याङ्क विभाग)का भौतिक संरचनाहरू ढल निकासकै बाटोमा निर्माण गरिएको उल्लेख गर्दै हटाउनुपर्ने सबै ब्लकेजहरु हटाइने बताउनु भयो ।
महानगरले तत्कालका लागि अतिक्रमण गरी बनाइएका संरचना हटाउने, भित्री ढल र टुकुचाको पिँध सफा गरी किनार फराकिलो बनाउने, छोपिएका म्यानहोल उठाउने र समन्वय संयन्त्रलाई सक्रिय बनाउन बताइएको छ
