काठमाडौं । प्रधानमन्त्री वालेन्द्र शाहले नेपालको पर्यटन प्रवर्द्धनका लागि सरकारले द्रुत गतिमा काम अघि बढाएकाले होटल व्यवसायीहरूले व्यक्त गर्दै आएको चिन्ता क्रमशः अन्त्य हुने विश्वास व्यक्त गर्नुभएको छ।
प्रधानमन्त्री तथा मन्त्रिपरिषद्को कार्यालयमा बुधबार होटल संघ नेपाल (हान) का पदाधिकारीहरूसँग भएको विशेष छलफलमा प्रधानमन्त्री शाहले निजी क्षेत्रलाई राज्यको विकासको महत्वपूर्ण साझेदारका रूपमा अघि बढ्न आग्रह गर्दै कानुनको पालना गर्दै व्यवसाय सञ्चालन गर्नुपर्नेमा जोड दिनुभयो।
उहाँले साना तथा मझौला होटलहरूलाई पर्यटन विभागमा दर्ता गरी करको दायरामा ल्याउन, साथै सार्वजनिक–निजी साझेदारी (पीपीपी) मोडेलमार्फत पर्यटन क्षेत्रमा सहकार्य विस्तार गर्न सकिने विषयमा अध्ययन गर्न हानलाई आग्रह गर्नुभयो।
संस्कृति, पर्यटन तथा नागरिक उड्डयन मन्त्री खडक राज पौडेलको उपस्थितिमा भएको छलफलमा होटल संघ नेपालका पदाधिकारीहरूले नेपालको होटल उद्योग वार्षिक ४० लाख पर्यटकलाई सेवा दिन सक्षम रहेको जानकारी गराएका थिए। हाल भने वार्षिक करिब १२ लाख पर्यटक मात्रै नेपाल भित्रिरहेको उल्लेख गर्दै उनीहरूले पर्यटक आगमन बढेमा रोजगारीका अवसर उल्लेखनीय रूपमा विस्तार हुने र नेपाली युवालाई वैदेशिक रोजगारीमा जानुपर्ने बाध्यता कम गर्न होटल उद्योग प्रभावकारी माध्यम बन्न सक्ने बताएका छन्।
हानले नेपालमा आरोग्य पर्यटन, गन्तव्य विवाह (डेस्टिनेसन वेडिङ) तथा क्रस–बोर्डर पर्यटनको ठूलो सम्भावना रहेको औंल्याउँदै सरकारसमक्ष विभिन्न नीतिगत सुधारका प्रस्ताव पनि पेश गरेको छ।
संघले होटल उद्योगलाई उत्पादनमूलक उद्योगसरह विद्युत् महसुलमा सहुलियत दिन, २५ शय्यासम्मका होटलका लागि अनिवार्य गरिएको संक्षिप्त वातावरणीय मूल्याङ्कन (आईईई) को सीमा ५० शय्यासम्म पुर्याउन तथा पोखरा र भैरहवा अन्तर्राष्ट्रिय विमानस्थललाई पूर्ण रूपमा सञ्चालनमा ल्याई नेपाल एयरलाइन्सको सेवा सुधार गर्न माग गरेको छ।
त्यसैगरी, वैदेशिक लगानी तथा प्रविधि हस्तान्तरण ऐन, २०७५ अन्तर्गत ट्रेडमार्क प्रयोगबापतको रोयल्टी शुल्कमा रहेको पाँच प्रतिशतको सीमा संशोधन गरी आपसी सहमतिका आधारमा निर्धारण गर्न सकिने व्यवस्था गर्न, होटल व्यवसायसँग सम्बन्धित कानुन पुनरावलोकन गर्न तथा डेस्टिनेसन वेडिङका लागि गरगहना ल्याउने प्रक्रिया सहज बनाउन पनि संघले सरकारसँग आग्रह गरेको छ।
आरोग्य पर्यटनको अन्तर्राष्ट्रिय प्रवर्द्धनका लागि फोटो र भिडियोमा मात्र सीमित नभई ‘फुल स्टोरी टेलिङ’ अवधारणामा आधारित प्रचार सामग्री र विशेषज्ञ जनशक्तिको व्यवस्था गर्नुपर्ने सुझाव पनि व्यवसायीहरूले दिएका छन्।
छलफलमा होटल संघ नेपालका कार्यवाहक अध्यक्ष दिनेश तुलाधर, महासचिव साजन शाक्य, कोषाध्यक्ष युवराज श्रेष्ठ, कार्यसमिति सदस्य जयदिन श्रेष्ठ र आश्लेषा कार्की तथा सचिवालय प्रमुख टेकबहादुर महत सहभागी हुनुहुन्थ्यो।
