काठमाडौं । जल तथा मौसम विज्ञान विभागअन्तर्गतको बाढी पूर्वानुमान महाशाखाले आगामी तीन दिन देशभरका साना नदी, खोल्सा तथा खोल्सीहरूमा आकस्मिक बाढीको जोखिम रहने भएकाले उच्च सतर्कता अपनाउन आग्रह गरेको छ।
महाशाखाका अनुसार कोशी, नारायणी, बागमती, कर्णाली, महाकाली तथा तिनका प्रमुख सहायक नदीहरूको बहाव हाल सामान्य अवस्थामा रहेको छ। कन्काई, कमला, बबई, पूर्वी र पश्चिम राप्ती नदीको बहाव पनि सतर्कता तहभन्दा तल रहेकाले तत्काल ठूलो जोखिम देखिएको छैन।
तर निरन्तर वर्षाका कारण झापा, इलाम, पाँचथर, ताप्लेजुङ, तेह्रथुम, सङ्खुवासभा, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, धादिङ, गोरखा, चितवन, तनहुँ, लमजुङ, कास्की, नवलपरासी (पश्चिम), रुपन्देही, कपिलवस्तु, दाङ, बाँके, बर्दिया, कैलाली, कञ्चनपुर, डडेलधुरा लगायतका जिल्लामा बहने साना नदी तथा खोलाहरूमा पानीको सतह उल्लेख्य रूपमा बढ्न सक्ने पूर्वानुमान गरिएको छ।
महाशाखाले भोलि र पर्सिसम्म पनि कोशी, मधेश, बागमती, गण्डकी, लुम्बिनी, कर्णाली तथा सुदूरपश्चिम प्रदेशका धेरै साना नदीहरूमा आकस्मिक बहाव बढ्ने सम्भावना रहेको जनाएको छ।
नदी तटीय क्षेत्र, खोला किनार तथा डुबानको जोखिम भएका स्थानमा बसोबास गर्ने नागरिकलाई सतर्क रहन, अनावश्यक रूपमा नदी तर्न वा खोलामा प्रवेश नगर्न तथा स्थानीय प्रशासन र सम्बन्धित निकायबाट जारी हुने सूचना पालना गर्न महाशाखाले अनुरोध गरेको छ।
