काठमाडौं । नेपाल–भारत सीमा विवादबारे प्रधानमन्त्री बालेन शाहले संसदमा व्यक्त गरेको भनाइप्रति भारतले औपचारिक प्रतिक्रिया जनाएको छ। भारतले दुई देशबीच रहेका सीमासम्बन्धी विषयहरू समाधान गर्न कुनै तेस्रो मुलुकको भूमिका आवश्यक नरहेको स्पष्ट गरेको हो।
मंगलबार आयोजित नियमित पत्रकार सम्मेलनमा भारतीय विदेश मन्त्रालयका प्रवक्ता रणधीर जैसवालले नेपालका प्रधानमन्त्रीको अभिव्यक्तिलाई भारतले ध्यानपूर्वक लिएको बताएका छन्। उनले नेपाल–भारत सीमाका अधिकांश क्षेत्रको सीमांकन सम्पन्न भइसकेको उल्लेख गर्दै बाँकी रहेका विषयहरू द्विपक्षीय संयन्त्रमार्फत समाधान गर्ने प्रक्रिया जारी रहेको बताए।
उनका अनुसार भारत–नेपाल सीमाको झण्डै ९८ प्रतिशत भागको सीमांकन सम्पन्न भइसकेको छ। दशगजा क्षेत्रसँग सम्बन्धित केही समस्या तथा अन्य प्राविधिक विषयहरू समाधान गर्न दुवै देशबीच स्थायी संयन्त्र सक्रिय रहेको उनले जानकारी दिए।
प्रवक्ता जैसवालले गण्डक नदीको धार परिवर्तनका कारण केही स्थानमा जटिलता उत्पन्न भएको स्वीकार गर्दै यस्ता क्षेत्रमा सुरक्षाकर्मी परिचालन गरिएको र अवस्थालाई सावधानीपूर्वक व्यवस्थापन गरिएको बताए।
यसअघि प्रधानमन्त्री बालेन शाहले प्रतिनिधिसभामा सांसदहरूले उठाएको प्रश्नको जवाफ दिँदै नेपाल–भारत सीमा विवाद समाधानका लागि कूटनीतिक पहल जारी रहेको बताएका थिए। उनले सीमा सम्बन्धी विषयमा नेपाल र भारतसँगै बेलायतसँग पनि संवाद भइरहेको उल्लेख गरेका थिए।
लिपुलेक, लिम्पियाधुरा र कालापानी क्षेत्रबारे उठेका प्रश्नको जवाफमा प्रधानमन्त्री शाहले भारतले मात्र नभई नेपालले पनि केही स्थानमा भारतीय भूमि अतिक्रमण गरेको तथ्य फेला परेको दाबी गरेका थिए। साथै, उनले विवादित क्षेत्रका विषयमा नेपाल सरकारले भारतलाई कूटनीतिक नोट पठाइसकेको र त्यसको जवाफ प्राप्त भइसकेको जानकारी दिएका थिए।
प्रधानमन्त्री शाहले सीमा समस्या ब्रिटिस भारतकालदेखि नै रहँदै आएको विषय भएकाले बेलायतसँग समेत संवाद भइरहेको बताएका थिए। तर भारतले भने यस्ता विषयहरू केवल नेपाल र भारतबीचको द्विपक्षीय प्रक्रियाबाटै समाधान हुनुपर्ने अडान दोहोर्याएको छ।
