म्याग्दी। म्याग्दीको अन्नपूर्ण गाउँपालिका–४ नारच्याङमा आज सम्पन्न निःशुल्क आँखा उपचार शिविरबाट ४३० जना लाभान्वित भएका छन् ।
अन्नपूर्ण गाउँपालिका–४ नम्बर वडा कार्यालय, लायन्स क्लबको पोखरा आँगन र लेकसिटीको संयुक्त आयोजना तथा हिमालयन आँखा अस्पताल पोखराको प्राविधिक सहयोगमा दुई दिनसम्म शिविर सञ्चालन भएको थियो ।
शिविरमा १० जना मोतियाविन्दुका बिरामीको शल्यक्रिया गरिएको अन्नपूर्ण गाउँपालिका–४ का वडाध्यक्ष लोकबहादुर फगामीले जानकारी दिनुभयो । नारच्याङ, घार र दोवाका बासिन्दाहरुले सेवा लिएका हुन् ।
हिमालयन आँखा अस्पताल पोखराका नेत्र चिकित्सक डा ज्योत्स्ना शर्माको नेतृत्वमा रहेको स्वास्थ्यकर्मीको टोलीले सेवा प्रदान गरेको थियो । आँखा परीक्षण, शल्यक्रिया, परामर्श, औषधि र चश्मा वितरणसम्बन्धी सेवा निःशुल्क उपलब्ध गराएको नारच्याङका वडासदस्य श्याम पुर्जाले बताउनुभयो ।
मोतियाविन्दुको शल्यक्रियापश्चात् गुमेको ज्योति फर्किएकोमा सेवाग्राहीहरुले खुसी व्यक्त गरेका छन् । गाउँमै मोतियाविन्दुको शल्यक्रियासम्बन्धी सुविधा पाउँदा पोखरा जान आउन लाग्ने समय र खर्चको बचत भएको सर्वसाधारणको भनाइ छ । रासस
