काठमाडौँ । नेपाली कांग्रेसको अनुशासन समितिले निवर्तमान कार्यवाहक सभापति पूर्णबहादुर खड्कालाई कारबाही गर्ने तयारी गरेको छ ।
पार्टीको विशेष महाधिवेशनबाट नयाँ कार्यसमिति चयन भएको भए पनि खड्काले अहिले पनि कार्यबाहक सभापतिको हैसियतमा विज्ञप्ति प्रकाशन गरिरहेको भन्दै पार्टीले कारबाही गर्न लागेको हो ।
कांग्रेस सभापति गगन कुमार थापाले हिजो नै कांग्रेसको अनुशासन समितिलाई यस विषयमा निर्देशन दिइसकेका बताइएको छ । सभापति थापाको सोही निर्देशन बमोजिम नै भोलि कांग्रेसको अनुशासन समितिको बैठक बस्न लागेको छ ।
सोही बैठकले खड्कालाई सबैभन्दा पहिला किन त्यसो गरेको हो भन्ने विषयमा स्पष्टिकरण लिने र त्यसपछि उनलाई अनुशासनको कारबाही गर्ने भएको हो ।
गत पुस २७ देखि ३० गतेसम्म आयोजित विशेष महाधिवेशनबाट चुनिएको गगन थापा नेतृत्वको केन्द्रीय कार्यसमितिलाई निर्वाचन आयोगले गत माघ २ गते आधिकारिकता दिएको थियो । त्यसपछि खड्कासहितका १४औँ महाधिवेशनबाट आएका पदाधिकारीहरू निवर्तमान भएका थिए ।
तर पनि आयोगको त्यो निर्णयविरुद्ध १४औँ महाधिवेशनबाट सभापतिमा निर्वाचित शेरबहादुर देउवा र नेता डा.शेखर कोइराला समूहले उक्त विशेष महाधिवेशन अवैध रहेको भन्दै दायर गरेको रिट सर्वोच्च अदालतमा विचाराधीन छ ।
त्यसैले सोही रिटको अन्तिम सुुनुवाई नहुँदासम्म आफूहरुको आधिकारिकता रहने भन्दै देउवा पक्षका कार्यबाहक सभापति खड्काले सो निर्णय गरेका हुन् ।
तर पनि कार्यबाहक सभापति दाबी गर्दै आएका खडका्ले भने विेशष महाधिवेशनबाट निर्वाचित कार्यसमितिलाई चुनौती दिएर विज्ञप्ति प्रकाशन गर्दै आएका छन् ।
खड्काले सोमबार पनि कार्यवाहक सभापतिको हैसियतमा पार्टीको लेटरप्याडमा विज्ञप्ति निकालेका थिए । त्यसपछि कांग्रेसले उठाएको प्रश्नमा उनले आफू नै आधिकारिक रहेको बताएका थिए ।
