काठमाडाैँ । रुकुमपूर्वका प्रतिनिधिसभा सदस्य उम्मेदवार एवं नेपाली कम्युनिष्ट पार्टीका (नेकपा)का संयोजक पुष्प कमल दाहाल ‘प्रचण्ड’ले रुकुमपूर्वको विकासदेखि लिएर अहिलेको परिस्थितिमा देशलाई निकास दिनेसम्मको सङ्कल्प गरेका छन् । देशलाई अप्ठ्यारो परिस्थितिमा पुर्याउने र देशलाई जलाउनेहरू चुनावी मैदानमा दौडिरहँदा नेपाली कम्युनिष्ट पार्टी देशलाई सही दिशा दिने सङ्कल्पका साथमा चुनावी मैदानमा रहेको उनकाे भनाइ छ ।
नेकपाका संयोजक दाहालले रुकुमपूर्वबाट चुनाव लड्दै गर्दा विकासका हिसाबले तुलनात्मक रूपमा पछि परेको यस जिल्लालाई अग्रणी बनाउनका लागि विशेष आर्थिक तथा पूर्वाधार प्याकेज लागू गर्ने सङ्कल्प गरे । जनयुद्धकालमा जसरी यस जिल्लाको चुनवाङ बैठकले देशलाई शान्तिको मार्ग देखाएको थियो, त्यसरी नै अब रुकुमपूर्वले देशलाई समृद्धिको मार्ग देखाउनुपर्ने भनाइ उनको छ । त्यसै कारण देशलाई समृद्धिको मार्गमा अगाडि बढाउन मुख्य भूमिका खेल्ने यस जिल्लाको विकासका लागि प्याकेज बनाएर काम गर्ने कुरालाई संयोजक दाहालले चुनावी घोषणापत्रमा उल्लेख गरेका छन् ।
रुकुमपूर्वलाई सुगम बनाएको मध्यपहाडी लोकमार्गको पूर्णता तथा सहिदमार्ग (थवाङ, महत, काँक्री, तक, हुकाम, मैकोट, दुले हुँदै शहरतारा–डोल्पा) सडकलाई सम्पन्न गर्न पहल गर्ने, सङ्घीय सरकार र प्रदेश सरकारबाट टेन्डर आह्वान भएका मोटरेबल पुल, झुलुङ्गे पुललगायत पूर्वाधार योजना निर्धारित समयमै सम्पन्न गर्न पहल गर्ने कुरा घोषणापत्रमा उल्लेख गरिएको छ ।
यस्तै सानीभेरी, उत्तरगङ्गा, ढोरपाटन करिडोर र दुईखोली (रोल्पा), चुनवाङ, रुकुमकोट, सिस्ने, डोल्पा जोड्ने सडकलाई पूर्णता दिने, जिल्लाको तीनवटै पालिका केन्द्रसहित वडा र वडा जोड्ने पक्की सडकमार्फत यातायात क्रान्ती गर्ने बताइएको छ । योजना प्रोजेक्ट बैंकमा रहेका जिल्लाका योजनाको प्राथमिकीकरण र कार्यान्वयमा जोड दिनुका साथै स्थानीय नदिनालाबाट लघु तथा मेघा जलविद्युत् उत्पादन, प्रत्येक वडासम्म केन्द्रीय प्रसारण लाइन विस्तार, जिल्लामा ग्रिड स्थापना, सिँचाइ पूर्वाधारको विस्तार तथा आधुनिक र व्यावसायिक कृषि प्रणाली लागू गर्ने कुरा घोषणापत्रमा उल्लेख गरिएको छ ।
यस्तै पुथा–सिस्ने हिमशृङ्खला, तालतलैया, ढोरपाटन सिकार आरक्ष, मगर सांस्कृतिक बस्ती र जनयुद्धका ऐतिहासिक स्मृतिसहितका सम्पदाको संरक्षण गर्दै पर्यटन प्रवद्र्धन गर्ने, यार्सागुम्बा, पाँचऔँलेलगायत बहुमुल्य जडीबुटीको उत्पादन, संरक्षण, प्रशोधन केन्द्र स्थापना र बजार सुनिश्चित गर्ने योजना प्रचण्डको छ । जिल्ला अस्पतालमा २४सै घण्टा विशेषज्ञ चिकित्सक, आवश्यक उपकरण र प्रभावकारी स्वास्थ्य सेवा सुनिश्चित गर्ने, सामुदायिक शिक्षाको गुणस्तर सुधार, थोरै विद्यार्थी धेरै विद्यालयको समस्यालाई समाधान गर्न विद्यालय केन्द्रिकरण, विषयगत शिक्षकको व्यवस्था, आवासीय सुविधा र गुणस्तर अभिवृद्धिको लागि आवश्यक नीति निर्माण तथा कार्यान्वयन गर्ने साथै सङ्घ, प्रदेश र स्थानीय तहबाट सुरु भएका अधुरा र क्रमागत योजनालाई पूर्णता दिने कुरालाई संयोजक दाहालले आफ्नो चुनावी घोषणापत्रमा उल्लेख गरेका छन् ।
जनयुद्धको उद्गमथलोसमेत रहेको रुकुमपूर्वका जनतासँग संयोजक दाहालले यो जिल्ला आफ्नो लागि केबल एउटा निर्वाचन क्षेत्र मात्र नभएर राजनीतिक पुनर्जन्मको थलो र परिवर्तनको उद्गमस्थल रहेको बताए । विस्तृत शान्ति सम्झौताको जीवित हस्ताक्षरकर्ता हुनुको नाताले जनयुद्धका सहिद, बेपत्ता तथा घाइते योद्धाहरूको सम्मान, तिनका परिवारका लागि राहत र परिपूरणका कार्यलाई निष्कर्षमा पुर्याउनेसँगै द्वन्द्वकालीन मुद्दाको रानीतिक तथा कानुनी निरूपण गरी शान्तिलाई दिगो बनाउन आफू प्रतिबद्ध रहेको कुरा संयोजक दाहालले बताए ।
लुम्बिनी प्रदेशद्वारा घोषित अर्गानिक जिल्ला रुकुमपूर्वलाई चाहिने आवश्यक नीति र नियम निर्माण गर्दै प्रमाणीकरण तथा बजार सुनिश्चत गरी यहाँको उत्पादनलाई ‘प्रिमियम ब्राण्ड’ का रूपमा सहरका डिपार्टमेन्टल स्टोरसम्म पुर्याउने र देशकै गुणस्तरीय टिम्मुरलाई ब्राण्डिङ, स्याउ, सुन्तला, कागतीलगायत फलफूलहरू, अर्गानिक तरकारी, अन्नबालीलाई बजारीकरण गर्ने कुरालाई संयोजक दाहालले प्रतिबद्धतापत्रमा उल्लेख गरे ।
मगर समुदायको बाहुल्यता रहेको यस जिल्लामा संविधानको मर्मअनुसार मगर क्लस्टरलाई स्वायत्त क्षेत्र घोषणा गरी ‘खाम मगर’ सभ्याताको विश्वव्यापी ब्रान्डिङ गर्ने प्रयास गर्ने, यहाँको फलाम खानी उत्खनन तथा जडीबुटी प्रशोधन केन्द्र स्थापना गरी जिल्लालाई ‘नमुना औद्योगिक जिल्ला’ बनाउने प्रतिबद्धता उनले व्यक्त गरे । यसबाट प्राप्त रोयल्टीले रुकुमपूर्वलाई नेपालकै धनी जिल्लाहरूको सूचीमा पुर्याउन सकिने उनको भनाइ छ ।
रगतले लेखिएको संविधानको रक्षा गर्दै सङ्घीयतालाई अझ मजबुत बनाउने र मधेसी, जनजाति, दलित तथा मगर समुदायको स्वायत्तताका लागि आवश्यक संविधान संशोधन प्राथमिकतामा रहने उनले उल्लेख गरे ।
नेपाली कांग्रेबाट उम्मेदवार बनेकी कुसुमदेवी थापाले रुकुमपूर्व बनाउने १० भिजन तयार पारेर चुनावी प्रचारप्रसारमा हुनुहुन्छ । उहाँले आफ्नो प्रतिबद्धतापत्रमा क्रमशः सडक तथा पूर्वाधार विकास, मिसन रोजगारी, शिक्षा र स्वास्थ्य, कृषि र प्राकृतिक स्रोत, पर्यटन र संस्कृति, खानेपानी र सिँचाइमा उल्लेख्य रूपमा काम गर्ने प्रतिबद्धता जनाइन् ।
यस्तै, विद्युतीकरण र दूरसञ्चार, सुशासन र संविधान, कानुन निर्माणमा भूमिका र बजेटमा समन्वय गरी रुकुमपूर्वको विकासमा योगदान दिने प्रतिबद्धता थापाले व्यक्त गरेकी छन् ।
यस्तै नेकपा एमालेले जिल्लाको समग्र विकासलाई केन्द्रमा राख्दै सडक यातायात, शिक्षा, स्वास्थ्य, खानेपानी, सिँचाइ तथा जलस्रोत, सूचना–सञ्चार तथा विद्युतीकरण, उद्यम विकास तथा रोजगारी सिर्जना, कृषि–वन पैदावार तथा पशुपालन, मौलिक कलासंस्कृतिको संरक्षण तथा पर्यटन प्रवर्द्धन, प्राकृतिक स्रोत व्यवस्थापन, विपद् व्यवस्थापन, युवा तथा खेलकुद, सहरी विकास, सुशासन प्रवद्र्धन, द्वन्द्वकालीन यौनजन्य हिंसा पीडितका सवाल, महिला सशक्तीकरण तथा समानताका लागि विशेष कार्यक्रमलगायत कुरालाई लिएर जनताको माझमा पुगेको छ ।
नेकपा एमालेबाट उम्मेदवार बन्नुभएका लीलामणि गौतमले जिल्लाको विकासको मेरुदण्डका रूपमा रहेको मध्यपहाडी राजमार्गको निर्माण सम्पन्न गर्ने, सहिद मार्गको यथाशीघ्र निर्माण पूरा गर्ने, देउखोला–कुमा नायगाड–सिस्ने हुँदै डोल्पा सडक सञ्जाल विस्तार गर्ने, देउखोला–जामा–त्रिवेणी–तकसेरा सडक निर्माण गर्ने, चुन्बाङ–रुकुमकोट सडक स्तरोन्नति तथा कालोपत्र गर्ने, भुमे र सिस्ने रिङ रोड स्तरोन्नति गर्ने, सेरा–दमचन–ढोरपाटन सडक विस्तारलगायत जिल्लाका अन्य सडक सञ्जालले नछुने वडा तथा बस्तीमा पाँच महिनाभित्र सडक पहुँच पु¥याई बाह्रै महिना सुरक्षित र भरपर्दो यातायात सञ्चालन गर्ने लक्ष्य राखिएको बताए ।
शिक्षण पेसालाई मर्यादित बनाउँदै शिक्षकहरूको वृत्तिविकास गरिने, भुमे गाउँपालिका लुगुममा बहुप्राविधिक शिक्षालय सञ्चालन गरिने तथा पुथा उत्तरगङ्गा गाउँपालिकामा स्थापना हुने क्याम्पसलाई स्रोतसाधन सम्पन्न बनाउने, सडक दुर्घटना तथा आकस्मिक बिरामीलाई लक्षित गर्दै भुमे गाउँपालिका काक्री स्वास्थ्य चौकीलाई स्तरोन्नति गरी ट्रमासेन्टरका रूपमा विकास गर्ने, खानेपानी तथा सिँचाइतर्फ ‘एक घर, एक धारा’ अवधारणाअनुसार प्रत्येक घरमा स्वच्छ खानेपानी सुविधा पुर्याइने, सिँचाइ प्रणाली स्तरोन्नति गरिने तथा जिल्लामा सञ्चालित खानेपानी योजना समयमै सम्पन्न गर्न पहल गर्ने जनाइएको छ ।
सूचना–सञ्चार तथा विद्युत्तर्फ जिल्लाका ३१ वटै वडामा केन्द्रीय विद्युत् प्रसारण लाइन विस्तार गरिने र उद्यम विकासतर्फ युवा उद्यमशीलता प्रवर्द्धन गर्दै रोजगारीको ग्यारेन्टी गरिने तथा कृषि उद्यममार्फत रोजगारी सिर्जना गर्ने लक्ष्य राखिएको कुरा एमालेको प्रतिबद्धतापत्रमा उल्लेख गरिएको छ ।
यस्तै प्रजातन्त्र लोकतान्त्रिक पार्टी प्रलोपाका उम्मेदवार सन्दिप पुनले पनि रुकुमपूर्वको दुर्गममा सडक, यातायातको पहुँच, जनताको स्वामित्वमा ऊर्जा विकास, कृषि र वनमा प्रकृतिसँग मेल खाने विकास, खानी र उद्योगमा स्रोतको सही उपयोग, पलायन होइन उत्पादनमा आधारित युवा नीतिलगायत कुरालाई घोषणापत्रमा उल्लेख गरे ।
यस्तै शिक्षामा समान अवसरको आधार तयार पार्ने, सहिद परिवारको जिवनयापनको ग्यारेन्टी गर्ने, ऐतिहासिक युद्धस्थल र स्मारकको संरक्षण, जिल्लाको गौरवशाली इतिहासमा सबैको पहुँच, सिकार पर्यटनलाई व्यवस्थित गर्ने, होमस्टे, स्थानीय गाइड, सांस्कृतिक कार्यक्रम, गाउँमै पर्यटन आम्दानी सुनिश्चित, युवालाई रोजगारी, युद्ध पर्यटन प्रवर्द्धन गर्ने कुराहरूलाई घोषणापत्रमा उल्लेख गरे ।
फागुन २१ मा हुने निर्वाचनका लागि रुकुमपूर्वमा पुष्पकमल दाहाल प्रचण्डसहित ११ जना उम्मेदवार चुनावी मैदानमा छन्। यतीबेला सबैले आआफ्ना चुनावी प्रतिबद्धतापत्रसहित जनता रिझाउने काममा व्यस्त छन् ।
