काठमाडाैँ । जिल्लाका दुई सङ्कटग्रस्त सहकारीबाट ऋण लिएर चुक्ता नगर्ने ऋणीलाई जिल्ला प्रशासन कार्यालय र जिल्ला प्रहरी कार्यालयले कारबाहीको चेतावनी दिएको छ। प्रशासनले उक्त ऋणीलाई तत्काल ऋण चुक्ता गर्न आग्रह गरेको छ।
जिल्ला प्रहरी कार्यालय काभ्रेपलाञ्चोकले बनेपा नगरपालिका क्षेत्रभित्र सञ्चालन हुने दुई सहकारी—मुकुल बचत तथा ऋण सहकारी संस्था (बनेपा–७) र पशुपति बचत तथा ऋण सहकारी संस्था (बनेपा–१०)—बाट ऋण लिएर चुक्ता नगर्ने र सम्पर्कमा नआउने १४२/१४२ जना ऋणीलाई कार्यालयमा अनिवार्य उपस्थित भएर ऋण चुक्ता गर्न सार्वजनिक सूचनामार्फत आग्रह गरेको छ।
प्रहरी अनुसन्धान अधिकृत वेदनारायण श्रेष्ठका अनुसार, ती दुवै सहकारीका सञ्चालकले बचतकर्ताको रकम हिनामिना गरी ठगी गरेको विषयमा उजुरी परेपछि कारबाही प्रक्रिया अघि बढाइएको हो। उनले बताउनुभयो, “सम्पर्कमा नआएमा तोकिएको पाँच दिनभित्र खोजी कार्य गरी कानुन बमोजिम कारबाही गरिनेछ।”
जिल्लामा सञ्चालन भइरहेका करिब एक दर्जन सहकारीमा बचत रकम हिनामिनासम्बन्धी उजुरी परेका छन्। उजुरीमा २६ जनालाई पक्राउ गरिएको छ भने ६७ जना सहकारी सञ्चालक फरार रहेको प्रहरीले जनाएको छ। अनुसन्धान जारी रहेको र आवश्यक परे क्रमशः ऋणीलाई ऋण चुक्ता गर्न अनुरोध गरिने जनाएको छ।
