काठमाडौं । नेपाली कांग्रेसका कार्यवाहक सभापति पूर्णबहादुर खड्काले पार्टीका महामन्त्रीहरूले आफूलाई धोका दिएको आरोप लगाएका छन्।
पार्टी केन्द्रीय कार्यालय सानेपामा जारी केन्द्रीय कार्यसमितिको बैठकलाई सम्बोधन गर्दै खड्काले पुसमा नियमित महाधिवेशन गर्ने विषयमा महामन्त्रीहरूसँग सल्लाह गरेरै कार्यतालिका ल्याइएको भए पनि कामकारबाही समयमा सम्पन्न हुन नसकेको बताए।
उनले भने – ‘पुसमा नियमित महाधिवेशन गर्ने विषयमा महामन्त्रीहरूसँग सल्लाह गरेकै हो। सोही सल्लाहअनुसार तालिका ल्याउँदा कामकारबाही गर्दागर्दै भ्याइएन। तर महामन्त्रीहरूले आफूले कुनै सल्लाह नै नगरेको जस्तो व्यवहार गर्दै धोका दिनुभयो।’
खड्काले कामकारबाही हुन नसक्नुमा आफ्नै भूमिका नभएको जस्तो गरी महामन्त्रीहरू विशेष महाधिवेशनतर्फ उन्मुख भएको आरोप पनि लगाए। ‘यसले पार्टीलाई विभाजनतर्फ धकेल्ने काम गरेको छ,’ उनले बैठकमा भने।
बैठकमा सहभागी एक केन्द्रीय सदस्यका अनुसार खड्काले पार्टी विभाजनतर्फ उन्मुख भएको दाबी गर्दै गम्भीर चेतावनीसमेत दिएका छन्। ‘अब पार्टी फुटतर्फ जाने लगभग निश्चित जस्तै छ,’ खड्काको भनाइ उद्धृत गर्दै ती सदस्यले बताए।
खड्काले महामन्त्रीहरूले प्रधानमन्त्रीको उम्मेदवार घोषणा गर्ने, सभापतिको राजनीतिक सन्यासको प्रस्ताव राख्ने तथा निर्वाचनलाई हाइकमान्डमार्फत सञ्चालन गर्ने विषय अघि सारेको दाबी गर्दै ती प्रस्तावहरू केही विषयमा सहमत हुनै नसक्ने खालका रहेको बताए।
