काठमाडौं । प्रधानमन्त्री सुशीला कार्कीले आज आगामी फागुन २१ गतेको चुनावका विषयमा विघटित प्रतिनिधि सभाका प्रमुख ७ राजनीतिक दलहरुसँग संवाद गर्दै हुनुहुन्छ ।
प्रधानमन्त्री कार्कीले सातै दललाई दुई दुई जना उच्चस्तरीय प्रतिनिधि आउन आग्रसहितको पत्र पठाउनुभएको हो । बैठक प्रधानमन्त्री निवास बालुवाटारमा अपराह्न चार बजे बस्ने छ ।
निर्वाचन गराउने मुख्य कार्यभारसहित बनेको वर्तमान सरकारले राजनीतिक संवादको पहल गर्दै विघटित प्रतिनिधि सभाका राष्ट्रिय मान्यता प्राप्त दलहरूलाई औपचारिक छलफलका लागि आमन्त्रण गरेको छ ।
निर्वाचन नजिकिँदै गर्दा पनि सरकारले वातावरण नबनाएको भन्दै दलहरु रुष्ट थिए । त्यही कारण सरकारले दलहरूसँगको संवादहिनता तोड्दै छलफलमा बोलाएको हो । चुनावमा नजाने बताइरहेको नेकपा एमालेसमेत सरकारले बोलाएको छलफलमा सहभागि हुने भएको छ ।
एमालेले प्रतिनिधि सभा पुनस्र्थापनालाई बटमलाइन बनाएको छ । तर प्रधानमन्त्री कार्कीले बोलाएको छलफलमा सहभागी हुने भएको हो ।
एमालेका तर्फबाट महासचिव शंकर पोखरेल र प्रदीप ज्ञवाली छलफलमा सहभागी हुने बताइएको छ ।
नेपाली कांग्रेसबाट महामन्त्री गगन थापा नै छलफलमा सहभागी हुँदै हुनुहुन्छ ।
नेकपा माओवादी केन्द्रले पनि सरकारले बोलाएको छलफलमा सहभागी हुने बताइसकेको छ । माओवादी केन्द्रले चुनावका लागि प्रधानमन्त्रीले छलफल गर्नु सकारात्मक भएको प्रतिक्रिया दिएको छ ।
रास्वपाबाट पार्टी उपसभापति स्वर्णिम वाग्ले छलफलमा सहभागी हुनुहुने छ । राप्रपा र जसपा नेपालबाट पनि छलफलमा सहभागी हुने निश्चित भइसकेको छ ।
जनमत पार्टीबाट चन्दन सिंह सहभागी हुनुहुने छ ।
