काठमाडौँ । नेकपा (माओवादी केन्द्र)का अध्यक्ष पुष्पकमल दाहालले नेकपाका संस्थापक नेता नरबहादुर कर्माचार्र्य नेपाली कम्युनिष्ट आन्दोलनको प्रतिक रहेको बताउनुभएको छ ।
स्वर्गीय नेता कर्माचार्यको स्मृति दिवसमा शुक्रवार काठमाडौंमा आयोजित एक कार्यक्रमलाई सम्बोधन गर्दै अध्यक्ष दाहालले यस्तो बताउनुभएको हो । उहाँले नेता कर्माचार्यलाई सरलता, सज्जनता र सही विचारप्रति अविचलित प्रतिवद्धता राख्ने नेता वर्णन गर्नुभयो । अध्यक्ष दाहालले २०४६ सालको जनआन्दोलनपछि माओवादी विचारधारा मान्ने शक्तिहरू एकतावद्ध भएको स्मरण गर्दै अध्यक्ष दाहालले त्यही समय उहाँसँग सहकार्य गर्ने मौका पाएको बताउनु भयो । अध्यक्ष दाहालले स्वर्गीय नेता कर्माचार्यको योगदानको स्मरण गर्दै आफूले सधैँ आफ्नो अभिभावकको रुपमा सम्झिने गरेको बताउनु भयो ।
उहाँले भन्नुभयो, ‘कमरेड नरबहादुर कर्माचार्य नेपालको कम्युनिष्ट आन्दोलनकै एउटा प्रतिक हो । सरलता र सजहताको पनि प्रतिक । उहाँको स्मृति दिवको अवसरमा उहाँलाई उचित सम्मान गर्ने काम आज भएको छ । उहाँ जहिले पनि सही विचारको आधारमा कम्युनिष्ट एकतामो पक्षपोषण गर्नुहुन्थ्यो । २०४६ सालको जनआन्दोलनको लगत्तै पछि हामी माओवाद या विचार मान्ने शक्तिहरु एकतावद्ध भएका हौँ । उहाँ अध्यक्षको रुपमा र म महासचिवको रुपमा केही समय सँगै काम गर्ने अवसर प्राप्त भयो । त्यतिबेला मैले उहाँलाई एकदमै सरल, इमानदार, निष्ठावान र क्रान्तीकारी विचारप्रति अविचलित रुपले अगाडि बढ्ने एउटा नेता र अभिभावकको रुपमा मैले पाएँ ।’
उहाँले कर्माचार्यको वैचारिक दृढता र संगठकीय प्रतिबद्धता नेपाली कम्युनिष्ट आन्दोलनका लागि प्रेरणाको स्रोत भएको बताउनु भयो ।
