काठमाडौँ । स्पेन नेसन्स लिगको फाइनलमा प्रवेश गरेको छ । गएराति भएको सेमिफाइनल खेलमा फ्रान्सलाई ५–४ गोलले हराउँदै स्पेन उपाधि नजिक पुगेको हो ।
जर्मनीको एमएचपी एरेनामा भएको नौ गोलको थ्रिल खेलमा पहिलो हाफमा स्पेनले २–० गोलको अग्रता बनाएको थियो ।
फ्रान्सले सबै चारै गोल दोस्रो हाफमा गरेको थियो । २२ औं मिनेटमा निको विलियम्स र २५ औं मिनेटमा मिकेल मेरिनोले गोल गर्दै स्पेनलाई पहिलो हाफमा दुई गोलको अग्रता दिलाएका थिए ।
५४ औं मिनेटमा लामिने यामलले पेनाल्टीमार्फत गोल गर्दै स्पेनलाई ३–० ले अघि बढाए । ५५ औं मिनेटमा पेड्रीले गोल गर्दै स्पेनको अग्रता ४–० को बनाए ।
यता, ५९ औं मिनेटमा किलियन एम्बाप्पेले पेनाल्टीमा गोल गर्दै फ्रान्सलाई १–४ को स्थितीमा ल्याए । ६७ औं मिनेटमा यामलले व्यक्तिगत दोस्रो तथा टोलिका लागि पाँचौं गोल गरे । ७९ औं मिनेटमा रायन चेर्कीले गोल गर्दै फ्रान्सलाई २–५ को स्थितीमा ल्याए । ८४ औं मिनेटमा स्पेनका डानी भिभियानले आत्मघाती गोल गरेपछि फ्रान्स ३–५ को स्थितीमा आयो ।
खेलको इन्जुरी समयमा कोलो मोउनीले गोल गरेपनि फ्रान्सका लागि ढिला भइसकेको थियो । उनको गोलले अग्रता छोट्टिएर ४–५ मा ल्याएपनि फ्रान्स प्रतियोगिताबाट बाहिरिसकेको थियो ।
फाइनलमा अब स्पेन र पोर्चुगलबीच प्रतिस्पर्धा हुनेछ । पोर्चुगलले जर्मनीलाई हराउँदै फाइनलको टिकट काटिसकेको छ । फाइनल खेल जर्मनीको एलियान्ज एरिनामा आइतबार राति हुनेछ ।
