काठमाडौं । स्वास्थ्यकर्मीले चिकित्सकमाथि भएको आक्रमणको विरोधमा दोषीलाई कानुन बमोजिम कारबाहीको माग गर्दै आज घण्टाघरमा विरोध प्रदर्शन गरेका छन् ।
यहाँस्थित नारायणी अस्पतालमा उपचारका क्रममा शनिबार वीरगञ्ज महानगरपालिका–२५ निवासी ४५ वर्षीय राजकुमार पटेलको मृत्यु भएको थियो ।
बिरामीको मृत्यु भएपछि मृतकका आफन्तले चिकित्सकमाथि गरेको आक्रमणको विरोधमा अस्पतालका स्वास्थ्यकर्मीले प्रदर्शन गरेका हुन् । पटेलको मृत्युको कारण चिकित्सकको लापरबाहीले भएको आरोप उहाँका परिवारका सदस्य तथा आफन्तले लगाउँदै आउनुभएको छ ।
आकस्मिक कक्षमा कार्यरत चिकित्सक (मेडिकल अफिसर) डा प्रमोद राम गम्भीरमाथि आक्रमण हुँदा उहाँ घाइते हुनुभएको छ । घाइते चिकित्सकको अस्पतालको सघन उपचार कक्ष (आइसीयु) मा उपचार भइरहेको छ ।
प्रदर्शनकारीले दोषीलाई कानुन बमोजिम कारबाही हुनुपर्ने र स्वास्थ्यकर्मीको सुरक्षाको सुनिश्चित गर्नुपर्ने माग गरेका छन् । सहभागीले ‘दोषीलाई कारबाही गर’, ‘निलम्बन फिर्ता गर’ र ‘डाक्टर प्रमोदलाई न्याय दे’ लेखिएका प्ले कार्ड बोकेका थिए । अस्पतालले छानबिन समिति गठन गरेको छ । साथै उपचारमा संलग्न पाँच जना स्वास्थ्यकर्मीलाई छानबिन प्रतिवेदन नआउञ्जेलसम्म जिम्मेवारीबाट हटाइएको छ । रासस
