काठमाडौं: प्रधानमन्त्री केपी शर्मा ओलीले आज प्रमुख सत्तारुढ दल नेपाली कांग्रेसका तर्फबाट ऊर्जा, जलस्रोत तथा सिँचाइ राज्यमन्त्री रहेका पूर्णबहादुर तामाङ (कान्छाराम) लाई बर्खास्त गरेका छन् ।
उनी कांग्रेसको रामेछाप जिल्लाका सभापति हुन् भने २०७९ मंसिरको प्रतिनिधिसभा चुनावबाट निर्वाचित सांसद हुन् । कान्छाराम गएको साउन १८ गते राज्यमन्त्रीमा नियुक्त भएका थिए ।
उनको बर्खास्तगीको संयोग यस्तो परेको छ कि कांग्रेस सभापति शेरबहादुर देउवा हाल स्वास्थ्य उपचारका लागि थाइल्याण्डको बैंककमा छन् । यही बेला प्रधानमन्त्री ओलीले राज्यमन्त्री तामाङलाई बर्खास्त गरेका हुन् ।
त्यसो त प्रधानमन्त्री ओली उनीदेखि सुरुदेखि नै सन्तुष्ट थिएनन् । उनी राज्यमन्त्री नियुक्त भएदेखि नै सञ्चारमाध्यममा निर्माण व्यवसायी, त्यो पनि विभिन्न आयोजनामा कालो सूचीमा परेका निर्माण व्यवसायीलाई मन्त्री बनाएको भनेर निकै आलोचना भएको थियो ।
प्रधानमन्त्री ओलीले कान्छाराम मात्र नभएर उर्जामन्त्री दीपक खड्कालाई नै बर्खास्त गर्न चाहन्थे । किनभने उनी मन्त्री बनेदेखि नै लैनचौरस्थित स्काउटका सटरहरु भाडामा लिएर करोडौँ रुपैयाँ भाडा नतिरेको भनेर विवादमा आएका थिए ।
मिडियाले निकै नै खेद्न थालेपछि प्रधानमन्त्री ओलीले यस विषयमा पटक पटक कांग्रेसका सभापति शेरबहादुर देउवासँग परामर्श पनि गरेका थिए । तर देउवाले नमानेपछि यो प्रकरण यसै रोकिएको थियो ।
त्यसपछि विकसित परिस्थितिमा प्रधानमन्त्रीले कुनै पनि हालतमा कुलमानलाई बर्खास्त गर्र्ने एजेण्डामा थिए । त्यो एजेण्डामा मन्त्री खड्काले प्रधानमन्त्रीलाई साथ दिएका थिए ।
उता राज्यमन्त्री कान्छारामले भने कुलमानको सपोर्ट गर्न थालेका थिए । उनले सार्वजनिक रुपमा नै कुलमानलाई हटाउन नहुने बताएका थिए । त्यसपछि प्रधानमन्त्रीले उनका बारेमा चासो राखेर कांग्रेसबाट सरकारमा नेतृत्व गरेका प्रकाशमान सिंहलाई पनि भनेका थिए ।
प्रकाशमान सिंहमार्फत उनले पठाएको खबर पनि कान्छारामले सुनेको नसुन्यै गरेका थिए । त्यसपछि प्रधानमन्त्रीले कांग्रेसका सबै मन्त्रीहरुलाई यो कुरा भनेका थिए । तर पनि उनले प्रधानमन्त्रीसँग माफी माग्न मानेका थिएनन् । त्यसपछि प्रधानमन्त्रीले उनलाई आज बर्खास्त गरेका छन् ।
कांग्रेसकै एकजना मन्त्री भन्छन्‐ सुरुमा त प्रधानमन्त्री उर्जामन्त्रीलाई नै हटाउन चाहेका थिए । तर कुलमान हटाउने काण्डमा प्रधानमन्त्री र उनको कुरा मिलेपछि उर्जामन्त्री थामिए, यता राज्यमन्त्री फालिए ।
