काठमाडौं । नेकपा माओवादी केन्द्रको विद्यार्थी संगठन अखिल क्रान्तिकारीको नेतृत्व चयनका लागि आज मतदान हुँदैछ । सातै प्रदेशमा हुने निर्वाचनका लागि नेताहरुले आफू निकट विद्यार्थी नेतालाई अघि सारेका छन् । ३३ जना पदाधिकारीका लागि मात्रै १ सय ५५ जनाको उम्मेदवारी छ ।
सातै प्रदेशका निर्वाचन केन्द्रमा मतदान हुनेछ । अखिल क्रान्तिकारीले गत पुस १४ मा मतदान गराएर ३२ वर्षे उमेर हद लगाउनुपर्ने निर्णय गरेको थियो । त्यहीअनुसार केन्द्रीय समितिमा ३२ वर्ष उमेरमुनिका विद्यार्थीबीच प्रतिस्पर्धा हुँदै छ ।
अध्यक्षमा पाँच जनाले उम्मेदवारी दिएका छन् । अध्यक्ष पुष्पकमल दाहाल पक्षधरले विजय सापकोटालाई उम्मेदवार बनाएका छन् भने वरिष्ठ उपाध्यक्ष नारायणकाजी श्रेष्ठनिकट उपदेशकुमार यादव र उपाध्यक्ष कृष्णबहादुर महरानिकट योगेन्द्रबहादुर बुढाले पनि उम्मेदवारी दिएका छन् । उपमहासचिव जनार्दन शर्मा पक्षले हेमन्त राईलाई अध्यक्षको उम्मेदवार बनाएको छ । अध्यक्षका अर्का उम्मेदवार सुदीन पौडेल उपमहासचिव वर्षमान पुननिकट हुन् ।
संस्थापन पक्षले सर्वसम्मत नेतृत्व चयन गर्ने प्रयास गरे पनि सहमति जुट्न नसकेपछि अध्यक्षमा धेरै जनाको उम्मेदवारी परेको हो ।
अखिल क्रान्तिकारीको विधानअनुसार १ अध्यक्ष, खुला ४, समावेशी ५ गरी ९ उपाध्यक्ष, एक महासचिव, ९ उपमहासचिव, १२ सचिव र १ कोषाध्यक्ष निर्वाचित हुनेछन् । उपाध्यक्षमा अटल आचार्य, खेमबहादुर सिंह, जीवन खड्का, टंकप्रसाद उपाध्याय, तुलसीराम न्यौपाने, देउमा जैसी, देवकी कार्की, देवेन्द्रराज शर्मा, विराज थापा, भीष्मराज चौलागाईं, मदन ढकाल, मुना काप्री, योगेश भट्टराई, रमेश आचार्य, राजीवरमण न्यौपाने, रोशन खड्का, लालबहादुर पाण्डे, विनोद कोइराला, समीप खरेल र समीर बुढाथोकीले उम्मेदवार छन् ।
संस्थापन पक्षका रोशन खड्काले अनलाइनमार्फत महासचिवमा उम्मेदवार दिएका थिए । तर निर्वाचन समितिले उम्मेदवारको अन्तिम नामावली प्रकाशित गर्दा खड्काको नाम उपाध्यक्षमा राखेको छ । यसबारे निर्वाचन समितिका प्रमुख वरिष्ठ अधिवक्ता मुक्ति प्रधानसमक्ष उजुरी परेको छ । महासचिव जनार्दन शर्मा पक्षका उम्मेदवारहरुले यसमा आपत्ति जनाएका छन् । उजुरी दिनेहरुमा महासचिवका उम्मेदवार रोशन थापा मगर, उपाध्यक्षहरु ममता अधिकारी, देवेन्द्र शर्मा, भीष्मराज चौलागाईं र कृष्ण सुनार छन् ।
संस्थापन पक्षबाटै महासचिवमा तिर्सना हमाल, शिव बस्नेत र श्याम रोकाले उम्मेदवारी दिएका छन् । शर्मा पक्षले भने रोशन थापा मगरलाई महासचिवको उम्मेदवार बनाएको छ । सञ्जयकुमार महतो, सञ्जीव फुँयाल, प्रतीक कार्की, पदमबहादुर काफ्ले पनि महासचिवको उम्मेदवार बनेका छन् । अखिल क्रान्तिकारीको २ सय ४३ सदस्यीय केन्द्रीय समितिका लागि ५ सय जनाको उम्मेदवारी परेको छ । सबैले अनलाइन माध्यमबाट उम्मेदवारी दिएका हुन् ।
