एजेन्सी । बलिउड फिल्म निर्माता राम गोपाल वर्मालाई मुम्बईको अँधेरी मजिस्ट्रेट अदालतले मंगलबार (२१ जनवरी) चेक बाउन्स मुद्दामा तीन महिनाको जेल सजाय सुनाएको छ ।
अदालतका अनुसार राम गोपाल वर्माले ९० दिनभित्र उजुरीकर्तालाई ३.७२ लाख रुपैयाँ तिर्नुपर्नेछ । त्यसो नगरे थप तीन महिना जेल सजाय भोग्नुपर्नेछ ।
यो विषय विगत ७ वर्षदेखि चलिरहेको थियो । सुनुवाइका क्रममा रामगोपाल वर्मा अदालतमा उपस्थित थिएनन् । जसका कारण उनीविरुद्ध गैर जमानती वारेन्ट जारी गरिएको हो ।
रामगोपाल वर्माको फर्मले ‘श्री’ नामको कम्पनीलाई चेकमार्फत २ लाख ३८ हजार रुपैयाँ भुक्तानी गरेको थियो । यो चेक बाउन्स भयो ।
कम्पनीले महेशचन्द्र मिश्रमार्फत रामगोपालविरुद्ध मुद्दा दायर गरेको थियो । २०२२ मा, वर्माले यस मामलामा ५ हजार रुपैयाँको व्यक्तिगत मुचलामा जमानत पाएका थिए । अहिले अदालतले उनलाई दोषी ठहर गर्दै ३ महिनाको जेल सजाय सुनाएको हो ।
रामगोपाल वर्माले सामाजिक सञ्जालमा लेखेका छन् – ‘२.३८ लाखको विवाद छ, जुन मेरो पूर्व कर्मचारीसँग सम्बन्धित छ । मेरो वकिलले यो विषय हेर्दै हुनुहुन्छ । अहिले यो मुद्दा अदालतमा छ, त्यसैले म धेरै भन्न सक्दिनँ ।’
रामगोपाल वर्माले बलिउडलाई धेरै फिल्म दिएका छन् । उनका फिल्महरू प्रायः अन्डरवर्ल्ड र गुण्डाहरूको जीवनमा आधारित थिए ।
उनले सत्या, शूल, सरकार र कम्पनी लगायतका धेरै हिट फिल्म बनाएका छन् । उनले आफ्नो फिल्मबाट राष्ट्रिय पुरस्कार पनि जितेका छन् । सत्याले ६ वटा फिल्मफेयर अवार्ड जितेको थियो । विगत धेरै वर्षदेखि रामगोपाल वर्मा आफ्नो फिल्मका कारण भन्दा विवादका कारण बढी चिनिन्छन् ।
