एजेन्सी । भारतका ओलम्पिक च्याम्पियन नीरज चोपडाले शुक्रबार विवाह गरेका छन् ।
उनले २ दिनपछि आइतबार राति आफ्नो विवाहको ३ तस्विर सामाजिक सञ्जालमा पोस्ट गरे । तस्बिरमा उनकी श्रीमती हिमानी र आमा सरोज देवी देखिएकी छन् ।
२७ वर्षीय नीरजले सामाजिक सञ्जालमा लेखेका छन्– मेरो परिवारसँग जीवनको नयाँ अध्याय सुरु भयो । पारिवारिक स्रोतका अनुसार नीरज र हिमानीको विवाह समारोह निकै गोप्य रुपमा आयोजना गरिएको थियो ।
विवाहमा केटा र केटीका परिवारका सदस्य मात्रै सहभागी थिए ।
नीरजले शेयर गरेको तस्विरमा परिवारका केही सदस्य मात्रै सँगै बसेको देख्न सकिन्छ । विवाहको बारेमा परिवार बाहेक कसैलाई थाहा थिएन ।
को हुन् नीरजकी श्रीमती हिमानी ?
नीरजले आफ्नै राज्य हरियाणाको सोनीपत जिल्लाको लाडसौली गाउँकी टेनिस खेलाडी हिमानी मोरसँग विवाह गरेका हुन् ।
हिमानी अमेरिकाबाट खेलकुद अध्ययन गर्दैछिन् । उनका बुबा चन्द राम करिब २ महिनाअघि स्टेट बैंक अफ इन्डिया (एसबीआई)बाट सेवानिवृत्त भएका थिए । हिमानीका बुबाले गाउँमा खेलकुद रंगशाला बनाएका छन् । हिमानीले लिटिल एन्जल स्कूल, सोनीपतमा पढ्दा टेनिस खेल्न थालेकी थिइन् ।
भारतका गोल्डेन ब्वाई नीरज चोपडाले २०२४ पेरिस ओलम्पिकमा रजत पदक जितेका थिए । २७ वर्षीय नीरजले दोस्रो प्रयासमा सिजनको उत्कृष्ट ८९.४५ स्कोर बनाएका थिए । योसँगै उनी लगातार दुई ओलम्पिकमा पदक जित्ने तेस्रो भारतीय खेलाडी बने ।
नीरजले टोकियो ओलम्पिक २०२० मा पनि स्वर्ण पदक जितेका थिए । नीरज भन्दा पहिले, पहलवान सुशील कुमार र ब्याडमिन्टन खेलाडी पीवी सिन्धुले मात्र लगातार दुई ओलम्पिकमा भारतको लागि पदक जित्न सकेका थिए ।
