काठमाडौँ । भारतीय क्रिकेट कन्ट्रोल बोर्ड (बीसीसीआई)ले शनिबार इङ्ल्यान्डविरुद्धको एकदिवसीय सिरिज र च्याम्पियन्स ट्रफीका लागि भारतीय टोलीको घोषणा गरेको छ ।
मुम्बईको वानखेडे स्टेडियममा चयनकर्ता अजित आगरकर र कप्तान रोहित शर्माले १५ सदस्यीय भारतीय टोलीको नाम सार्वजनिक गरेका हुन् ।
फास्ट बलर मोहम्मद शामी एक वर्षपछि टिममा फर्किएका छन् । अष्ट्रेलिया भ्रमणका क्रममा घाइते भएका जसप्रित बुमराह पनि टोलीमा परेका छन् । चोटका कारण शामी नोभेम्बर २०२३ देखि टोलीबाट बाहिर थिए । टोलीमा ४ अलराउन्डर राखिएको छ ।
च्याम्पियन्स ट्रफी १९ फेब्रुअरीदेखि ९ मार्चसम्म पाकिस्तान र युएईका ४ सहरमा आयोजना हुनेछ । जसमा लाहोर, कराँची, रावलपिंडी र दुबई रहेका छन् । भारतीय टोलीका सबै खेल दुबईमा हुनेछन् । भारतले फेब्रुअरी २३ मा दुबईमा पाकिस्तानको सामना गर्नेछ ।
भारतीय टोलीले १२ वर्षअघि च्याम्पियन्स ट्रफीको उपाधि जितेको थियो । टोली पछिल्लो पटक २०१३ मा इंग्ल्याण्डलाई ५ रनले हराएर च्याम्पियन बनेको थियो ।
