एजेन्सी । जिम्बाब्वेले गाम्बियाविरुद्ध इतिहास रच्यो । गाम्बियाविरुद्धको टी–२० अन्तर्राष्ट्रिय खेलमा जिम्बाब्वेले सर्वाधिक रनको कीर्तिमान बनाएको छ ।
जिम्बाब्वेले २० ओभरमा ३ सय ४४ रन बनाएको थियो । जिम्बाब्वेका कप्तान सिकन्दर रजाले ३३ बलमा शतक बनाएर रोहित शर्माको कीर्तिमान तोडेका छन् ।
यससँगै जिम्बाब्वेले गाम्बियालाई कीर्तिमानी २९० रनले पराजित गरेको छ । सिकन्दर रजाले कुनै पनि टेष्ट खेल्ने राष्ट्रका लागि टी–२० अन्तर्राष्ट्रियमा सबैभन्दा छिटो शतक बनाए । सिकन्दर रजाले ४३ बलमा अविजित १३३ रन बनाए ।
उनले आफ्नो पारीमा ७ चौका र १५ छक्का प्रहार गरे । यसरी सिकन्दर रजाले रोहित शर्मा र डेभिड मिलरको कीर्तिमान तोडे । रोहित शर्मा र डेभिड मिलरले ३५ बलमा शतक बनाउने कीर्तिमान हासिल गरेका थिए ।
सिकन्दर रजाको कथा कुनै फिल्मको कथा भन्दा कम छैन । उनी पाकिस्तानमा जन्मेका थिए, तर स्कटल्याण्डमा सफ्टवेयर इन्जिनियरिङ पढेका थिए । यसअघि सिकन्दर रजाको प्रारम्भिक शिक्षा पाकिस्तान एयर फोर्स पब्लिक स्कूलमा भएको थियो ।
उनी पाइलट बन्न चाहन्थे, तर दृष्टि परीक्षण पास गर्न सकेनन् । सिकन्दर रजाको परिवार सन् २००२ मा जिम्बाब्वे सर्यो तर उनी अध्ययनका लागि स्कटल्याण्ड गए ।
स्कटल्याण्डको ग्लासगो क्यालेडोनियन विश्वविद्यालयबाट सफ्टवेयर इन्जिनियरिङमा डिग्री लिए । क्रिकेट पनि खेलिरहे । सिकन्दर रजा विश्वकप २०११ को सम्भावित टोलीमा छनोट भए पनि अन्तिम १५ खेलाडीमा स्थान पाउन सकेनन् ।
सिकन्दर रजाले २०१३ मा जिम्बाब्वेका लागि तीनवटै फर्म्याटमा डेब्यु गरेका थिए । हाल उनी जिम्बाब्वे टी–२० टोलीको कप्तान छन् । हालसम्म १७ टेस्ट म्याचबाहेक सिकन्दर रजाले १४२ ओडीआई र ९५ टी–२० खेलमा जिम्बावेको प्रतिनिधित्व गरिसकेका छन् । यसबाहेक उनी आईपीएलमा पञ्जाब किंग्सको हिस्सा पनि थिए । गत सिजन आईपीएलमा सिकन्दर रजाले २ खेलमा ४३ रन बनाएका थिए ।
