काठमाडौं । नेपाल कम्युनिस्ट पार्टी (नेकपा) का अध्यक्ष एवं प्रधानमन्त्री केपी शर्मा ओली पार्टी सचिवालयको बैठक टार्दै जाँदा आफैं अप्ठेरोमा परेका छन् । कार्यकारी अध्यक्ष पुष्पकमल दाहालसहित पाँच नेताले दुई दिनभित्र सचिवालय बैठक राख्न शनिबार अल्टिमेटम दिएका थिए । तर ओलीले बैठक बोलाउनुको साटो नेताहरूलाई बालुवाटार बोलाएर छलफल गर्दै आएका छन् ।
पार्टीमा देखिएको विवाद समाधान गर्न शीर्ष नेताका साथै पूर्वमाओवादी समूहका नेताहरूले सचिवालय बैठक तत्कालै बोलाउन आग्रह गरिसकेका छन् । यसअघि प्रधानमन्त्री ओलीप्रति सहानुभूति राख्ने नेताहरूले समेत बैठकबाटै समस्याको समाधान खोज्न आग्रह गर्न थालेका छन् । ‘केही समयअघि ओलीप्रति सहानुभूति राखेका र पूर्वमाओवादी खेमाका नेताहरूले पनि बैठक राखेर विवाद अन्त्य गर्न दबाब दिँदा प्रधानमन्त्री झन् अप्ठेरोमा परेका छन्’, नेकपा उच्च स्रोतले भन्यो । पार्टी महासचिव विष्णु पौडेलले भने केही दिनमै सचिवालय बैठक बस्ने बताएका छन् । ‘परामर्शपछि सचिवालय बैठक बस्छ’, उनले भने ।
तोकेको समयसम्म पनि ओलीले सचिवालय बैठक नबोलाएपछि सोमबार साँझ दाहालसहित वरिष्ठ नेताहरू माधवकुमार नेपाल, झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठ खुमलटारमा छलफलमा जुटेका थिए । उनीहरू मंगलबार एक दिन कुर्ने निष्कर्षमा पुगेको स्रोतले बतायो । त्यसअघि बिहान महासचिव पौडेल खुमलटार पुगेर ओली स्थायी कमिटी बैठकको निर्णय कार्यान्वयन गर्न तयार रहेको र विधानअनुसार बैठक बोलाउन लागेको जानकारी गराएका थिए । पौडेलसँगको भेटमा दाहालले सचिवालय बैठक तत्कालै बोलाएर विवादित विषयबारे छलफल गर्नुपर्नेमा जोड दिएका थिए । दाहालले सचिवालय बैठक आफैं पनि बोलाउन सक्ने संकेत गरेका थिए । स्रोतका अनुसार दाहालले पौडेलसँग भने, ‘कार्यकारी अध्यक्षको हैसियतले सचिवालय बैठक बोलाउन म पनि सक्छु तर ओलीजीले नै बैठक बोलाऊँ भन्नुभयो भने झन् सहज हुन्छ, विवाद हुन्न । पार्टी एकीकरणको मर्म र भावनाको सम्मान हुन्छ त्यसकारण चाँडै बैठक बसौं ।’
महासचिव पौडेलले भरसक चाँडै नै सचिवालय बैठक बस्ने बताउँदै दुई अध्यक्षबीच देखिएको संवादहीनता र दूरी कम गर्न आग्रह गरेका थिए । ‘पार्टी एकता दुई अध्यक्षले नै गरेको, त्यसलाई जोगाउने काम पनि दुई अध्यक्षकै भएकाले समस्याको समाधान भनेकै संवाद हो । त्यसकारण दूरी बढाएर वा एकले अर्कालाई दोष देखाएर पन्छिन मिल्दैन । संवादबाटै समस्या समाधान गर्न आग्रह गरिएको छ’, महासचिव पौडेललाई उद्धृत गर्दै स्रोतले भन्यो ।
महासचिव पौडेलले दुई अध्यक्ष र नेता नेपालबीच संवाद होस् भन्ने सबैको चाहना रहेको र संवादबाटै बैठकको अजेन्डा तय होस् भन्ने आफूहरूको आग्रह भएको बताएका थिए । दाहालले भने एक्लाएक्लै संवाद गर्नुभन्दा सबै विषय बैठकमै राख्ने र त्यहीं छलफल गर्ने बताएका थिए । स्रोतका अनुसार महासचिव पौडेलले तीन नेताबीच अनौपचारिक छलफल गरेर बैठकको अजेन्डा तय गर्न प्रस्ताव गरेका थिए ।
बालुवाटार पुगेका चार नेता प्रधानमन्त्रीलाई नभेटी फर्किए
नेकपाभित्रको आन्तरिक विवाद समाधान गर्न अग्रसर देखिएको तत्कालीन विवाद समाधान कार्यदलका सदस्यहरु सोमबार बालुवाटार पुगेर पनि प्रधानमन्त्री ओलीसँग भेट नगरी फर्किएका छन् । ओलीसँग छलफल गर्न तत्कालीन कार्यदलका चारजना प्रधानमन्त्री निवास पुगेका थिए ।
कार्यदलका ६ सदस्यमध्ये दुईजना अनुपस्थित भएपछि उनीहरू त्यत्तिकै फर्किएका हुन् । तत्कालीन कार्यदलका संयोजक एवं महासचिव पौडेलसहित सदस्यहरू भीम रावल, सुरेन्द्र पाण्डे र शंकर पोखरेल बालुवाटार पुगेका थिए । कार्यदलका सदस्यद्वय जनार्दन शर्मा र पम्फा भुसाल बालुवाटार गएनन् । शर्मा भने सोही समयमा दाहाललाई भेट्न खुमलटार पुगेका थिए ।
बालुवाटार पुगेका चारैजना पूर्वएमालेका नेता भएका कारण सन्देश राम्रो नजाने भन्दै प्रधानमन्त्रीलाई नभेटी फर्किएको एक नेताले बताए ।
‘प्रधानमन्त्रीसँग भेट गरेर गत भदौ २६ को स्थायी कमिटीको निर्णय कार्यान्वयनमा कहाँ समस्या परेको हो भन्ने विषयमा छलफल गर्न बालुवाटार गएका थियौं । कार्यदलमा रहेका जनार्दन शर्मा र पम्फा भुसाल आउनुभएन अनि प्रधानमन्त्रीलाई भेट नगरी फर्कियौं’, रावलले भने । यसअघि पार्टीमा विवाद हुँदा साउन ३० गते महासचिव पौडेलको नेतृत्वमा ६ सदस्यीय कार्यदल गठन गरिएको थियो ।
अनुशासन आयोगको चासो
नेकपा केन्द्रीय अनुशासन आयोगले बैठक बोलाउने कुरालाई प्रतिष्ठाको विषय नबनाउन नेताहरूलाई आग्रह गरेको छ । आयोगका अध्यक्ष अमृत बोहोराले सोमबार विज्ञप्ति जारी गर्दै यस्तो आग्रह गरेका हुन् । ‘पार्टीका जिम्मेवार नेतृत्वगणप्रति मेरो विनम्र आग्रह छ, पार्टी एकता आजको आवश्यकता हो । पार्टी एकताको विकल्पै छैन । समृद्ध समाजवादी समाज बनाउने ऐतिहासिक आवश्यकता पूरा गर्न यो एकता जरुरी थियो र भविष्यसम्म छ । फुट र विभाजन प्रतिगामी कुरा छन्’, विज्ञप्तिमा उल्लेख छ ।, समाचार नागरिक दैनिकमा प्रकाशित छ ।
