काठमाडौं । नेकपा माओवादी केन्द्रका अध्यक्ष पुष्पकमल दाहालको छटपटी बढ्दो छ । १८ महिनासम्म सरकारको नेतृत्व गरेर अहिले प्रतिपक्षीमा पुगेपछि पनि दाहालले फेरि सत्तामा पुग्ने बाटो मात्र खोजिरहेका छैनन्, सरकारप्रतिको असन्तुष्टि क्यास गर्ने प्रयाससमेत गरिरहेका छन् ।
आफ्नो पार्टीभित्रको विवादसम्म मिलाउन नसकेको भन्दै आलोचना खेप्दै आएका दाहालले सरकारलाई दिनहुँ जसो गाली गर्दै आएका छन् । सरकारको चर्को आलोचना गरिरहेका उनले छायाँ सरकार चलाउन कसरतसमेत गरेका छन् । सरकारले गर्नुपर्ने काम आफैं गर्न अग्रसरतासमेत उनले बढाएका छन् ।
दाहालले बाढी र डुबानपीडित नागरिकको क्षेत्रमा पुगेर आश्वासनसमेत बाँड्न थालेका छन् । उनले मंगलबार मात्र पनि काठमाडौंका बल्खुमा पुगेर स्वयमसेवकहरुको परिचालन गरेका छन् । पीडितको साथमा आफू सधैं रहने प्रतिबद्धता जनाउँदै सरकारले नागरिकको जीवन रक्षा गर्न नसकेको आरोप लगाए ।
शुक्रबार र शनिबारको भारी वर्षासँगै आएको बाढी, पहिरो र डुवानका कारण देश अस्तव्यस्त भएका बेला उनले सर्वदलीय बैठक नै आह्वान गरे । जुन प्रमुख प्रतिपक्षी दलको नेताले भने सरकारले नै गर्नुपर्ने थियो । दाहालले सर्वदलीय बैठक बोलाएको सार्वजनिक भएपछि कार्यवाहक प्रधानमन्त्री प्रकाशमान सिंहले सरकारका तर्फबाट सर्वदलीय बैठक बोलाए । दाहालले सर्वदलीय बैठक बोलाउन चासो देखाउनु आफैंमा रोचक थियो । तर पछि कार्यवाहक प्रधानमन्त्रीले नै बैठक बोलाएपछि दाहालले आफ्नो बैठक स्थगित गरे ।
बाढी, पहिरो र डुवान पीडितका समस्याका बारेमा छलफल गर्न भन्दै दाहालले सर्वदलीय बैठक बोलाउनुलाई छायाँ सरकारको कसरत हुनसक्ने बुझाइ कतिपयको छ । दाहालले बैठक आह्वान गर्नुअघिसम्म सरकारले त्यसबारे सोच्दै सोचेको थिएन । जब उनले बैठक बोलाए अनि हतारहतार सरकारले बैठक आह्वान गर्यो । दाहालको कदमले सरकारलाई दबाब बढाएको देखिएको छ ।
त्यसो त दाहालको दल नेकपा माओवादी केन्द्रले सरकारले जोखिम पहिचान र पूर्वतयारीमा ध्यान नदिँदा जनधनका क्षति भएको निष्कर्ष निकालिसकेको छ । उसले बाढीपहिरोको क्षतिबारे तथ्यांक संकलन गर्न हेल्प डेस्क नै राख्ने निर्णयसमेत गरेको छ । क्षतिसम्बन्धी स्थानीय तह र प्रदेशबाट तथ्यांक संकलन गर्न केन्द्रीय कार्यालयमा हेल्पडेक्स राखिने छ ।
बैठकले पार्टी सदस्य र निर्वाचित जनप्रतिनिधिले राहत कोषमा आर्थिक जम्मा गर्ने र पार्टी पंक्तिलाई राहत र पुनर्निर्माणमा केन्द्रित गर्ने निर्णय गरेको छ । त्यस्तै दीर्घकालीन पुन:स्थापना र पुनर्निर्माणका लागि आवाज उठाउनेलगायतका निर्णय पनि बैठकले गरेको छ ।
विपद्बाट भएको क्षतिको विवरण संकलन गर्ने दायित्व सरकारको हो । तर यसमा पनि माओवादी केन्द्रले सक्रियता बढाएर छाया सरकारको कसरत गरेको हो । विपद्मा परेका नागरिकको सहानुभूति बटुल्ने नियतसमेत माओवादी केन्द्रको देखिन्छ ।
माओवादी केन्द्रका अध्यक्ष दाहालले बाढीमा परेर बग्दै गरेकाहरुको उद्धार गर्नेहरुलाई सम्मान गरेको छ । शनिबार ललितपुरको नख्खुखोलाले बगाएका दुई जनाको उद्धार गर्ने युवा चणिकलाल तामाङलाई दाहालले आफ्नै निवासमा बोलाएर सम्मान गरेका हुन् । तामाङले शनिबार बिहान ललितपुर महानगरपालिका–२५ सुगम टोलस्थित नख्खु खोलाले बगाएका रौतहटका ४३ वर्षीय राजु साह र उनकी छोरी ६ वर्षीया मेघनालाई उद्धार गरेका थिए ।
टहराको छानामाथि चढेर गुहार मागिरहेका चार जनालाई सरकारी निकायले उद्धार गर्न नसकेपछि उनीहरू बगेका थिए । दाहालले सम्मान गरिरहँदा सरकारले भने चासो नै दिएका थिएन । तर त्यसलगत्तै कार्यवाहक प्रधानमन्त्री श्रेष्ठले पनि तामाङलाई बोलाएर औपचारिकता निर्वाह गरे ।
यसरी दाहालले सरकारलाई दबाबमा पार्दै जनताको मन जित्ने प्रयास गरेको देखिन्छ । यो उनले आफ्नो दायित्व बोध गरेका हुन् या छायाँ सरकारको कसरत ? यस विषयमा उनका आगामी दिनमा हुने कदम र रणनीतिबाट पक्कै पनि देखिने छ ।
