काठमाडौँ । बंगलादेशमा हिंसा बढ्दै गएपछि राष्ट्रपति मोहम्मद शाहबुद्दीनले संसद भंग गरेका छन् । यसका साथै देशकी पूर्व प्रधानमन्त्री खालिदा जियालाई पनि रिहा गरिएको छ ।
मंगलबार बंगलादेशमा आन्दोलनरत विद्यार्थीहरूले दिउँसो ३ बजेसम्म संसद विघटन गर्ने अल्टिमेटम दिएका थिए । उनले छिट्टै अन्तरिम सरकारका लागि नाम प्रस्ताव गर्ने बताए ।
शेख हसिनाविरुद्ध दुई महिना लामो प्रदर्शनको क्रममा सोमबार धेरै हिंसा भएको थियो । यसपछि हसिनाले प्रधानमन्त्री पदबाट राजीनामा दिएकी थिइन् ।
उनी ढाकाबाट अगरतला हुँदै भारत पुगेकी थिइन् । हिन्डन एयरबेसमा भारतका राष्ट्रिय सुरक्षा सल्लाहकार अजित डोभालले उनीसँग करिब एक घण्टा कुराकानी गरेका थिए । हसिना लन्डन वा फिनल्याण्ड जान सक्छिन् ।
ढाका ट्रिब्यूनको रिपोर्ट अनुसार बंगलादेशको राजधानी ढाकामा आज स्थिति नियन्त्रणमा रहेको छ । तर, सोमबार प्रहरी चौकीमा आक्रमण र आगजनी भएपछि प्रहरीमा डरको वातावरण छ । जसका कारण मंगलबार ढाकाका सडकमा ट्राफिक प्रहरीको सट्टा सिपाही र विद्यार्थीले ट्राफिक व्यवस्थापन गरेका छन् ।
