पोखरा । पोखरामा जारी २० औं संस्करणको आहा रारा गोल्डकप फुटबल प्रतियोगितामा आज (बुधबार) पहिलो सेमिफाइनल खेल हुँदैछ ।
मछिन्द्र फुटबल क्लब र नेपाल एपीएफ क्लबबीच पहिलो सेमिफाइनल खेल हुन लागेको हो । फाइनल पुग्नका लागि यी दुई टिमबीचको खेल दिउँसो २ः३० बजे सुरु हुनेछ ।
दुबै टिमको प्रमुख लक्ष्य जित निकाल्दै फाइनल पुग्नु हो । यस खेलको विजेताले उपाधिका लागि मनाङ मर्स्याङ्दी क्लब र त्रिभुवन आर्मी क्लबबीचको विजेतासँग खेल्नेछ ।
मछिन्द्रले साविक विजेता संकटा क्लबलाई ४-१ गोल अन्तरले पराजित गर्दै एपीएफसँगको भेट पक्का गरेको हो भने मछिन्द्रले पहिलो पटक सेमिफाइनलमा समेत स्थान बनाएको हो ।
एपीएफले पाहुना टोली बीवाईएससी मिनेसोटा युएसएलाई ३-१ गोल अन्तरले हराउँदै अन्तिम चारमा स्थान बनाएको हो ।
सहारा क्लब पोखराको आयोजनामा जारी प्रतियोगिताको विजेता टिमले १० लाख १ हजार प्राप्त गर्दा उपविजेता टिमले ५ लाख १ हजार प्राप्त गर्नेछन् ।
यस्तै, यस वर्ष पनि स्वर्गीय सूर्यबहादुर केसीको स्मृतिमा उत्कृष्ट ५ विधाको पुरस्कार प्रदान गरिने छ ।
