काठमाडौँ । सत्तारुढ प्रमुख घटक नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले नयाँ सत्ता समिकरणलाई दिगो, परिणामुखि र सफल बनाउन एमालेले सम्पूर्ण सामथ्र्य केन्द्रित गर्ने बताउनुभएको छ ।
शनिवारबाट ललितपुरको गोदावारीस्थित सनराईज हलमा शुरु भएको पार्टीको महाधिवेशन प्रतिनिधि परिषद् बैठकमा राजनीतिक प्रतिवेदन पेश गर्दै उहाँले सो कुरा बताउनुभएको हो । अध्यक्ष ओलीले जनताको मनमा यस सहकार्यको दिगोपनामाथि आशंका रहेको उल्लेख गर्दै त्यसको खण्डन पनि कुनै मन्तव्य वा वक्तव्यबाट नभई व्यवहारबाटै दिने बताउनु भयो ।
उहाँले जनतामा व्याप्त निराशा चिर्ने र देश अघि बढ्छ भन्ने विश्वास जगाउने गरी तिब्र रफ्तारका साथ काम गर्न सरकारलाई पनि सुझाव दिनुभयो । राजनीतिलाई सधैंभरी प्रयोगको थलो बनाईराख्न नसकिने उल्लेख गर्दै अध्यक्ष ओलीले त्यस खालको गतिविधि गरे आफँै फस्न सकिन्छ भन्ने तथ्यलाई हेक्का राख्न पनि प्रमुख प्रतिपक्ष दल नेपाली काँग्रेसलाई सचेत गराउनु भयो ।
उहाँले भन्नुभयो, ‘सरकारले जनतामा व्याप्त निराशा चिर्ने र देश अगाडि बढ्छ भन्ने विश्वास जगाउने गरी तिब्र रफतारमा काम गर्नुपर्नेछ । विगतका कतिपय घटना, सन्दर्भ र अनुभवको आधारमा जनताको मनमा यस सहकार्यको दिगोपनामाथि आशंका छन । यसको खण्डन कुनै औपचारिक मन्तव्य वा वक्तव्यबाट होइन, व्यवहारबाटै गरिनेछ । यसलाई विफल पार्न आरम्भदेखि नै विभिन्न तत्वहरु क्रियाशील रहेको देखिएकै छ ।
तर राजनीतिलाई सधैंभरी प्रयोगको थलो बनाईराख्न सकिँदैन । त्यसो गर्न थालियो भने कुनै दिन आफैँद्धारा निर्मित व्युहमा फस्न सकिन्छ भन्ने तथ्यलाई सबैले हेक्का राख्नुपर्छ । हाम्रो पार्टी यस सहकार्यलाई दिगो, परिणाममुखि, सफल बनाउन आफ्नो सम्पूर्ण सामथ्र्य केन्द्रित गर्नेछ ।
अध्यक्ष ओलीले एमालेले देश र जनताको हितका लागि नयाँ सत्ता समिकरण बनाएकाले त्यसमा पदीय लालचा नराखेको दाबी गर्नुभयो ।
