काठमाडौँ । काठमाडौँमा आज यस वर्षकै सबैभन्दा कम तापक्रम मापन गरिएको छ । काठमाडौँमा आज न्यूनतम तापक्रम तीन डिग्री मापन गरिएको छ ।
यसअघि गत सोमबार तीन दशमलव दुई डिग्री मापन गरिएकोमा शून्य दशमलव दुई डिग्री झरेपछि आज यस वर्षकै सबैभन्दा कम तापक्रम मापन गरिएको हो ।
यस्तै, आगामी तीन दिनसम्म देशभर ठूलो वर्षाको सम्भावना नदेखिएको जल तथा मौसम विज्ञान विभाग, मौसम पूर्वानुमान महाशाखाले जनाएको छ । ठूलो वर्षाको सम्भावना नभए पनि कतैकतै छिटफुट वर्षा हुनसक्ने सम्भावना रहेको छ ।
शुक्रबार बिहान पौने ६ बजे भने काठमाडौँको न्यूनतम तापक्रम ३.४ डिग्री सेल्सियस मापन भएको छ ।
आज सबैभन्दा कम तापक्रम जोमसोमको रहेको छ । तराईमा बाक्लो हुस्सु र कुहिरो जारी रहने तथा हिमाली क्षेत्रमा हिमपात र पहाडी क्षेत्रमा बादल लागेर घाम कम लाग्ने महाशाखाले जनाएको छ ।
महाशाखाले तापक्रमको पछिल्लो अपडेट हरेक दिन बिहान पौने ९ बजे र बेलुका पौने ६ बजे सार्वजनिक गर्ने गरेको छ ।
